Shillong, Jymmang 21: Ka HNLC kam don kano kano ka jingkynthoh ia ki shikurim kiba leit ban pyndemwait,kine kim shym la phettuh na ka Seng,hynrei ki dei kiba lah shu pan ban ieh noh kam da kaba khuid. Ka jingieh noh kam jong ki ka long ba u Nah Aiborlang Thongni u dei u briew uba dang don hapdeng ka jingsumar namar mynta lah kumba shibnai eiei. La ong u Bah Sainkupar Nongtraw Publicity Secretary jong ka seng lehnoh HNLC.
Ka ei kaba kham isaitmet ka long ba ka sorkar ka shim kabu pynban iaka jingleit pyndem jong ki haka kyrteng jong ka Jingsuk, ka jingkylli mynta ka long mano ba seng iaka GNLA? baroh ia tip ba u Sohan D Shira u dei ehrang uba lah pyndemwait teng mynba u dang long u Area Commander jong ka ANVC, bad ka jingphet arsien jong u sha khlaw ban seng ia ka GNLA ka kham shyrkhei arshah ban iaka ANVC haba bishar iaka jing shah ktah ka Shongsuk Shongsain haka jylla.
Haba kumta,kumno ka sorkar ka dang nud ban mutdur ba ka jingwan pyndemwait kan wanrah iaka jingsuk haka jylla? kaba kham pynlyngoh shuh shuh ka long ba ym dei tang u Sohan D Shira uba lah pyndemwait uba seng iaka GNLA hynrei u Chairman jong kane ka seng lei u dei syndon da u Deputy Superintendent of Police ( DSP) uba lah tip kyrteng kum u Champion Sangma.
Hato mutdur wat une u heh pulit ym shaniah iaka ‘system’ te kumno sa ka seng HNLC kiba lah pyrshah pulit,pyrshah sorkar lypa kin shaniah iaka sorkar haba ka khot wan pyndem ? Ka jingshah hiart hma ka Charlie Hebdo ha France ha u snem 2015 ka long ka nuksa ba ka ‘jingduna paid’ ka khamlah iaka ‘jingbunpaid’, la iohi ba ka Sorkar ha France ka don kam haduh 99,000 ngut ki pulit bad ki shipai tang ban kthong iaki arngut shipara kiba dei ki dkhot ka Al-Qaeda kiba leit synreit kuli ha katei ka jaka.
Lada phai sha Kashmir lap ba ka Sorkar India ka buh haduh 7 lakh tam ki Shipai tang ban ia khun bad ki ehrang jong ki Seng kieng atiar Muslim kiba don tang 500 tam ka jingbunpaid, namar kata ka jingkhlain ne ka jingtlot jong kano kano ka kynhun kam shongeh haka jingbunpaid kata ka dei ka jingiapher hapdeng ka thma ki ri pyrthei bad ka thma ki kynhun kiengatiar.
Wat u Fidel Castro u Nongpyllaitluid iaka Ri Cuba u ong, ha kato por ba u sdang iaka jingialeh laitluid u, u don tang 82 ngut ki briew, lada dei ba ngan hap ban sdang biang da kawei,nga donkam tang 10 ne 15 kiba don ia ka jingngeit kaba skhem.
Sa kawei ka jingkylli mynta ka mih ,hato phi mut ba tang uwei ne arngut u snar ka Seng HNLC yn nym lah ban pynthut iaka Shongsuk Shongsain haka jylla lada ka HNLC ka ai hukum tang shikyntien? wat uwei u heh pulit ka Meghalaya u lah ju kubur teng ha ki snem kiba lah leit, ba ban leh iaki kam pyntriem tang 4,5 ngut ki dkhot ka HNLC ruh ki la lah ban leh.
Ka jingkwah iakren iasuk jong ka HNLC ne ka jingkhot iakren iasuk jong ka Sorkar kam mut ba ka dei ka Jingkutlad ne ka dei ka jingplielad, haba ka sorkar ka khot shispah sien, ka dei ka kamram ka HNLC ban jubab 100 sien iaka jingkhot ka Sorkar, lada sngewiahap iaka jingtyrwa ka sorkar kin wan,lada ka sorkar ruh kam sngewiahap iaka jingtyrwa jong ki ka lah ban kyntait kata kam don jingeh tangba ka jingialeh ka HNLC kan iaid beit.
Ka jingrakhe jong ka Sorkar mynta ka sngi iaka ‘Anti-terrorism day’ ka dei tang ka jingrakhe ban shu pyndep rukom,Ki don bun ki daw ba balei kam don ka jingmut shityllup ka pyrthei ba ia mynjur lang shaphang kaei ka jingmut jong ka kyntien ‘terrorism’. Haduh mynta mynne ym pat don uno uno ne kano kano ka ri ka ban jop ha ka ban ai iaka jingmut kaba iar kaba lah ban pdiang da baroh shaphang ka jingmut jong ka kyntien ‘terrorism’.
Hapdeng ki snem 1970 bad 1980 ka UN ka lah pyrshang ban ialeh ban ai ka jingmut bapura jong kane ka kyntien ba lah lap na ki nongrim jong ka jingiapher jingmut jong ki jingsngew hapdeng ki para dkhot jong ka, kaba dei halor ka jingpyndonkam ia ka jingiaumsnam ha ki jingiapher jingmut kaba iadei bad ka jinglaitluid ka jaidbynriew bad ka hok ki jaidbynriew ban rai hi da lade ia lade shaphang ka jinglaitluid.
Kine ki jingiapher ki pynlong ba kan eh ban poi sha ka rai khatduh shaphang ka jingmut halor kane, ban pynwan ne shim kawei ka jingmut kyllum kaban teh ha ka jingiasngew kaba iaid lyngba ka ain shaphang ka jingmut jong ka kyntien ‘terrorism’ ,namarkata kane ka jingrakhe iaka sngi ha India ruh ka lah pynlong beain lypa iaka jingiakhih paidbah jong kino kino ki kynhun ne ki sengbhalang khamtam ia kita ki riew ialehlaitluid kum jong u kiang nangbah, Tirot Sing,Subhash Chandra Bose, u Bhaghat Sing kiba iakhun pyrshah iaki dohlieh daka lynti jong ka jingiaumsnam. Ong u Bah Sainkupar Nongtraw Publicity Secretary ka seng HNLC.
