Shillong, 03 Jylliew: U general secretary ka Delhi Sikh Gurdwara Management Committee uba dei ruh u MLA na Delhi, u Manjinder Singh Sirsa ula wan hiar kyrkieh sha ka nongbah Shillong mynta ka sngi u Blei ban peit ia ka jinglong jingman jong ki jaitbynriew Sikh hadien ba la mih ka jingiakynad ha nongbah naduh ka sngi Thohdieng.
Haba kren sha ki lad pathai khubor, u Sirsa u la ong ba ki Sikh ki shngain ha nongbah Shillong bad kam dei satia kumba la pynsaphriang ha ki social media ne ha ki lad pathai khubor ka ri.
U Sirsa u la ong ba ka jingwan jong u sha Shillong ka long ban khmih ia ka jinglong jingman hadien ka jingphriang ki khubor lamler ha ki social media bad wat da ki katto katne ki lad pathai khubor ka ri kita ki National Media, ki la pynsaphriang ba ka la don ka jingthombor ia ki jaidbynriew Sikh kiba shong ba sah ha Shillong.
Hadien ka jingwan jurip ia ka jinglong jingman ka Nongbah, na ka liang u Sirsa u la kyntu ia ki paidbah ha baroh kawei ka ri ban nym ngeit ha ki khubor lamler namar kumba ka long mynta ki jaidbynriew Sikh ki shngain ha Nongbah Shillong.
“Ngi kwah ban phah ia ka khubor sha baroh ki jaidbynriew Sikh kiba don ha ri India ba kim dei ban khuslai ia ka jingjia ha Shillong bad kim dei ban ngeit ia ki khubor lamler lyngba ki social media ne ba la pynsaphriang da mano re namar ka sor Shillong ka long kaba shngain ia ki Sikh”, la ong u Sirsa.
Ka jingwan jong u Sirsa sha ka Nongbah kadei hadien ka jingiakynad kaba la sdang naduh ka janmiet jong ka 31 tarik Jymmang kaba la mih hapdeng ki ar tylli ki kynhun jaidbynriew kiba sah ha them Iewmawlong na ka jingshah shoh ki lai ngut ki briew. Kane ka jingwan jong u Sirsa ka dei ruh namar ba ki don ki katto katne ki ba thmu ban shim kabu na kane ka jingiakynad da kaba wanrah ia ki khubor lamler.
