Shillong, Naiwieng 21: ka Deputy CEM jong ka KHADC ka kong Telinia Thangkhiew haba jubab ia ka jingkylli jong u Bah J B Basaiawmoit mynta ka sngi hapoh ka iing dorbar kala ong ba ka KHADC kala pyntrei kam ia ka GST katkum ka jingbethah jong ka sorkar jylla.
La iathuh ruh hapoh ka iing dorbar ba kino kino ki skhim kiba la palat ia ka T.2.5 Lak tyngka kiba la ai sha ki kontraktor kila hap ban siew ia ka GST, hynrei lada ia ki jongtrei la ai sha ki dorbar shnong yn nym don kam ban siew ia ka GST.
U bah Ricky Shullai EM ba dei peit ia ka Water Resources haba jubab ia ka jingkylli u Bah JB Basaiawmoit u la ong ba ka dei ka jingshisha ba ka KHADC kala pynsangeh iaki nongtrei ba pynkhuid ia ka Wahumkhrah na ka daw bym don pisa shuh na ka skhim kaba la ai mynshuwa.
Haba jubab pat ia ka jingkylli jong ka kong Grace M Kharpuri haba ia dei bad ka professional tax, u EM ba dei peit ia kane ka tnad u bah Ricky Shullai u la ong ba ka jingioh lum na kane ka khajana kala kot sha ka T.7,99 klur.
Haba jubab pat ia ki jingkylli bynrap ha kaba ia dei bad ki nongdei madan, u EM u la ong ba na ki ym nym lah ban shim namar ka rukom shong dukan jong ki ka long baain ha kaba ki lah ban shah weng ha kano kano ka por. Ia ka Professional tax la shim tang na kiba trei ophis, ki ba trei haki kompeni bad kiba don ia ki dukan.
