Shillong, Jylliew 08: U Symbut Myntri Rangbah ka jylla u bah Prestone Tynsong u la pyntip ba ka sorkar mynta ka sngi kala shim ia ka rai ba kito ki skul kiba ioh ia ka jingiarap pisa na ka sorkar kin hap ban shim ia ka bai skul tang 50% na ka bynta u bnai Iaiong, Jymmang bad u bnai Jylliew.
Haba kren ha ki lat pathai khubor u symbut myntri u la iathuh ba ki skul kiba ioh ia ka jingiarap na ka sorkar ki long kum ki Government Aided School, Deficit School bad improve Deficit School kitei ki skul kin shim ia ka bai skul tang 50% ka bai skul. Lada don kiba la dep ban siew ki hap ban ia pynbeit.
Haba ia dei bad ki skul kiba la pyniaid da ki riew shimet kiba khlem ioh ei ei na ka sorkar kum ka jingiarap pisa kine ki skul kin nym lah ban shim ia kiwei kiwei ki jingsiew lait noh tang ia ka bai skul, la ban biang ba ki skul jong ki riew shimet kin hap ban shim tang ia kabai skul na ka bynta kitei ki lai bnai.
Na ka liang jong ka sorkar ka dang ia kren mynta bad kum kitei ki skul la ki lah ne em ban ia map lem 50% ka bai skul, kane ka long tang ka jingkyrpad na ka sorkar hynrei ka shong ha kito ki skul pat ban shim ia ka rai la kin pdiang ne em ia ka jingkyrpad ka sorkar.
Haba ia dei bad ka jingplie ia ki skul na ka liang jong ka sorkar kam pat don kano kano ka jingpyrkhat ia mynta namar kane ka shong ha ka ka sorkar pdeng ha dien kata ka jylla kan sa shim ia ka rai, hynrei ia mynta kam pat don kano kano ka jingiakren ban plie ia ki skul.
