Shillong, Iaiong 04: Ka Khun Hynnewtrep National Awakening Movement (KHNAM) hapoh ka jingialam jong u Bah Pyndap Saibon kum U President Rangbah duh lyngba ka State Youth Wing ha ka jingialam jong u Bah Thomas Passah ka la leit ban check ia ka jingkhia jong ki pla kot jong ki khynnah skul.
Kum ban shu pynkynmaw ba la shisnem tam,ka seng ka la shimkhia bha ia kane ka issue kaba la ktah shibun ia ka koit ka khiah jong ki hep ki ba rit bad ka sorkar jylla ka la pynmih ruh ia ka notification lyngba U Governor haka 11 Feb 2019, ha kaba la kdew shai kdar ia ka jingthew bad jingkhia jong kipla kot na ka bynta ki khynnah skul ha ki kyrdan klas ba pher bapher.
Ka KHNAM ka iohi ba bun ki skul kim patiaw lane pyntreikam ia kane ka notification jong ka sorkar. Na kane ka daw mynta ka sngi ngi la leit ban check hi da lade ryngkat u jingthew ia ka jingkhia jong ki pla kot jong ki khynnah skul jong ka skul Modern Mawprem kaba don ha Lower Mawprem. Ha kane ka jingleit wad jingtip, ngi la lap ba bun ki khynnah ki dang kit ia ki pla kot ki ba khia haduh 6/7 kilo, ki hep na ka klas II ki kit ia ki pla ki ba khia haduh saw kilo.
Na ka liang jong ngi, ngi la ia kynduh ia ka Principle jong kane ka skul ha kaba la kubur ba ka skul ka la ioh pdiang ia ka shithi na ka sorkar jylla halor kane ka bynta bad I la kular ruh ban shimkhia noh ia kane ka bynta mardor. Ngi juh tip ba ka skul kadei ka iing kaba ar jong ki hep barit bad Ki nonghikai ki dei ki kmie ki kpa ba ar jong ki khynnah skul bad nga tharai kadei ka bynta kaba kongsan jong ki skul ban shimkhia ia kane ka bynta naka bynta ka koit ka khiah jong ki khynnah.
Ka seng kan iai bteng ia kane ka jingleit khynra(Checking) tad haduh ka jingangud jong baroh kan urlong bad lada donkam ia ngi ban shim ia ki sienjam ki ba kham tyngeh ngim banse.
