Shillong, Naitung 02: U myntri rangbah jon
g ka jylla u Conrad K Sangma ha ka jingiadon lang u myntri ba dei peit ia ka pule puthi ha ka jylla u Bah Lahkmen Rymbui kila pynkup burom ia ki samla pule kiba la wan sha khmat ka eksamin bala pynlong da ka MBoSE ia kaba la pynbeit da ka skul bah University of Science and Technology, Meghalaya (USTM).
Haba kren ha kane ka jingpynkup burom ia ki samla pule kum u kongsan na ka liang jong u myntri rangbah u la ong ba ki skulbah ki dei ban pynleit jingmut ha kaba pynlong ia ki jingwad bniah da kaba ia treilang bad ka sorkar bad ba kin long ki nongai jingmut sha ka sorkar khnang ba ka sorkar ka lah ban shim ia kano kano ka rai na ka bynta ka jingbha jong ki paidbah.
Ha kane ka jingpynkup burom u myntri rangbah u la ong ba ka sorkar Meghalaya ka kwah ban wanrah ia ka jingkylla ha ka pule puthi bad ia ka Education Policy kaba la pynkhreh da ka sorkar mynta kala jan dep bad shen yn sa pyndep ia ka bad kyrmen ba kane ka polisi kan ai btin lynti ia ka sorkar ha kaba pyniaid ia ka jingpule ha ka jylla.
Kumba ka long mynta ka sorkar kala iai trei lang bad ki jaka ai jingpule na ka bynta ban pynkhreh ia ki samla pule jong ka jylla khnang ba kin lah ban long kiba la bit ban ia khun ia ka “Indian Civil Service Examination” la ong ba namar kim don ki jaka ai jinghikai kala buh ia ki samla pule ha ka jingeh.
U myntri rangbah u la ong ba ka sorkar kala ialeh kumno ban pynlong ia ki samla kane ka jylla ba kin long kiba la bit la biang ha kaba kin seng ia ki kam la jong khnang ba kin lah ban ieng ha la ki jong ki kjat hala ka jong ka kam. Kiwei kiba la kren ha kane ka jingpynkup burom ki long u myntri rangbah ba rim ka jylla u Dr DD Lapang, u Chancellor jong ka USTM u Mahbubul Haque bad u Vice Chancellor ka USTM Prof Alaka Sarma.
