Shillong, Jylliew 26: U Symbut Myntri Rangbah ka jylla u bah Prestone Tynsong u la kyntu ia ki paidbah ba kin kiar na kaba leit sha Guwahati namar ba kane ka jingpang COVID-19 kala kynrei bad kum ba ki tip kan don ka jingkhang dam naduh ka 28 tarik mynta u bnai ia katei ka sor.
Na ka liang jong ka sorkar ruh kala ia kren sani bha ha kaba ia dei bad kane jinglong jingman hapoh ka nongbah Guwahati namar ka sorkar Assam kala pynmih ia ka jingpynbna ba kan don ka jingkhang dam na ka bynta ar taiew hapoh katei ka sor, dei na kane ka daw ba ka sorkar Meghalaya ka kyntu ia ki briew ba kim dei ban leit sha Assam kane ka dei ka jingkyrpang na ka sorkar.
Lada don kiba hap ban leit na ki daw kiba ym lah ban kiar ruh ki hap ban ioh jingbit na ki Deputy Commissioner. U Symbut myntri la iathuh ba u wei u briew ba trei sha Guwahati u la wan phai ha ka 24 tarik mynta u bnai bad ha dien ba la test la shem ba u la ioh ia kane ka jingshitom, u dei na Ri Bhoi District na ka shnong Mawlong-Nongtluh.
La iathuh ba la shim sample haduh 18037 kiba long negative 17741, kiba dang ap ia ka reslot 250 kiba la jem 42, kiba ioh ia kane ka jingpang ki long 47 ngut bad kiba dang shitom ki long 4 ngut bad ki briew ka jylla kiba la wan phai ki long 18358 ngut.
Ha ka jingialang mynta ka sngi ka sorkar kala shim ia ka rai ban pynjynsur shuh shuh ia ka jingtrei kam bad ka rai ka long ba ia ki Hotel yn shah ban plie naduh ka 1th Naitung 2020 na ka liang jong ka sorkar kan sa pynmih ia ki kyndon ha kaba ia dei bad ki Hotel.
