Shillong, Lber 29: U Bah HS Shylla MDC jong ka Nongkrem haba ia shim bynta ha ka jingiakren hapoh ka iing dorbar jong ka KHADC halor ka mang tyngka jong u snem 2018-2019 u la ong ba ka KHADC ka dei ban pynshem ia ka jinglong trai ba kyrpang jong ki khasi da kaba shim jaid na ka kmie.
U la ong kumba ka long mynta palat 50000 ngut ki briew kila shim jaid na u kpa, lada shah ban shim jaid na ka kmie bad na u kpa kan poi sha ka ba ma bad kata ka dei ka shong sang, u la ong ba ha Ri India dei tang ki Khasi bad ki Garo kiba shim jaid na ka kmie.
Na ka liang jong u Bah Shylla, u la dawa ba ka KHADC ka dei ban leh ei ei ha kaba ia dei bad kane ka bynta, kala dei ban phah da ka jingthoh sha kito kiba la shim jaid kpa bad dei ban buh da ka por ba ki dei ban pynbeit noh da kaba buh hapoh ka por lada kim leh kumta kin duh noh ia ka jinglong khasi.
