Shillong, Lber 24: Ka KSU South West Khasi Hills District mynta Ka kynti ka la lap ba ki don daki spah ngut ki briew bad Ki khynnah ba la kha anna ha ki thain Warsan Lyngdoh bad ki thain Phlangdiloin hynrei kiba bun kim shym la don iaka Disability Certificate ne ka Syrnod ban ithuh iaki kum ki briew ba don jingduna ha ki dkhotmet. Ia kane , na ka liang jongka Seng kala lap haka jingleit ban jurip haka shnong Nongtynniaw, South West Khasi Hills District.
Ka Seng ka buh ka jingkylli iaka sorkar India bad iaka sorkar Meghalaya hapoh jongka jingialam u Mukul Sangma ba Shano Ka sorkar la buhrieh ia kine ki briew bad ki khynnah ba la kha anna baroh shikatta kylli ka KSU. La ong ba kane kam dei kaei hynrei ka dei ka jingpyrshang jong ka sorkar Meghalaya hapoh ka jingialam jongka Uranium Corporation of India Ltd ban buhrieh naka pyrthei ba kam shym la don kano kano ka jingktah naka jingkhlong ia u maw uranium haki snem 1990 bad ban pynbiej ruh sha ka pyrthei ba ka UCIL ka la lah ban iada iaka bih ia kaba la tip kum ka radiation uranium khnang ban ioh ban iaid shakhmat iaka Open Cast Mining bad uranium drilling bad ban buh ruh iaka Processing Plant ha katei ka thain.
Kane ka dei ka jingiuhroit iaka hok longbriew man briew da ka sorkar ia ki briew kiba sah ha katei ka thain, bad ka seng KSU ka kynnoh khlem artatien ba ka don kaei kaei sha lyndet jong kane ka jingshukor bad ka jingpynkhein ia ka hok jong ki nongshong shnong mynshwa haka por ba ka thain Warsan Lyngdoh Ka dang hap hapoh West Khasi Hills District. Ha ka jingleit jurip, ka seng ka la lap shai iaka jingdon ki khynnah bad rangbah ba la kha anna kum ka jing anna haka liang Ka Pyrkhat pyrdain , Ka jing anna haki kjat bad kiwei kiwei. La ong ba ka seng KSU ka dap daka jinglyngngoh pat ba kiba bun na kiba anna kim shym la don iaki Disability Certificate bad dei na kane ka daw ba kim shym la ioh bhah ruh iaki jingai jingiarap naka sorkar haduh mynta.
Haba iadei bad kane, na ka liang jongka Seng ka la leit ban iakynduh iaka Deputy Commissioner jongka South West Khasi Hills District ka Kong Ripnar Lyngdoh kumba mynta kane ka thain Warsan Lyngdoh Ka la hap hapoh ka District South West Khasi Hills bad kum ka seng KSU ka la dawa ruh na ka ba ka dei ban phah leh iaka survey sa shisien pat ha katei ka thain bad ban pynthikna ba baroh kiba anna dkhot met ha kitei ki thain kin ioh iaki Disabilty Certificate bad kin ioh bhah ruh ia ki jingiarap ne ki scheme naka sorkar ia kiba la mang khnang na ka bynta kum kine ki briew.
Na ka liang jong Ka Deputy Commissioner ka la kular ban shim khia halor kane ka bynta bad ban phah ruh iaka District Social Welfare Officer ban peit bniah biang sa shisien haba iadei bad kane. Na ka liang Ka Seng ka kyntu iaki paitbah ka thain ban mih shakhmat khamtam iaki lanot bad Ki ba haing ba mad ia kum kine ki apot lada Shem kano kano ka jingeh naka liang Ka Seng ngin leh ia kaba donkam, la ong u Bah Forwardman Nongrem President KSU SWKHD.
