Shillong, Risaw 12: U Myntri rangbah ka jylla u Conrad K Sangma mynta ka sngi u la ong ba lada kino kino ki bym hun ha kaba ia dei bad ka jingpynlut ha kane ka jingiakhun pyrshah
ia ka COVID-19 ki lah ban pan da ka RTI.
Halor ki jingkynnoh ha kaba ia dei bad ka jingpynlut u myntri rangbah ka jylla u la ong ba bun ki jinglut la pynlut ha kaba pynkhlain ia ki jaka ai jingsumar ha baroh ki District jong ka jylla, kine kim dei ba tang kum ka COVID-19 kim don kam shuh hynrei don kam ia ki ha kaba la khein lang ha ka jingpynlut ha ka COVID-19.
Ka jingthied ia ki Ventilator kine ki long kiba don kam bad kine kin shah ha ki jaka ai jingsumar bad ka jingthied ia ki kali Ambulance kane ruh la pynrung ha ka jinglut ha ka COVID-19 kine ruh kin sah na ka bynta ka jingmyntoi jong ki paidbah ha kaba kit ia ki ba pang ba shitom.
Ka sorkar kala ai jingiarap ia ki nongbylla na ka bynta kito ki sngi kiba ki duh bylla bad kane kala kot sha ka T.51 klur ha kaba kiwei ki jylla kim shym la leh kumba leh ka jylla Meghalaya, ka sorkar ka la buh ia ki Corona Care Centre, hooid ka sorkar kam shym la lah ban pynbiang ia ki kum ha ki Five Star Hotel hynrei ka sorkar kala ialeh ban pynbiang.
U Myntri rangbah u la ong ba lada ki don kino kino kiba dang kwah ban ioh jingshai shuh shuh ki lah ban pan da ka RTI ha kaba kin sa ioh lut ia ka jinglut jingsep baroh ha kaba ia dei bad kane ka jingiakhun pyrshah ia ka khlam COVID-19, la ong ba kane ka jingiakhun kam dei tang ka sorkar hynrei hap ban ia treilang da baroh ki paidbah.
Haba ia dei bad ka jingbuh dor jong ka sorkar mynta ia ki bai test, kane ka long katkum ka dor iew, kam don jingioh nong ia ka sorkar, hynrei ka sorkar ka pynlait ruh ia kito ki long iing kiba duk kiba don ia ka kard ban nym don kam siew ei ei lada ki phah test.
U Myntri rangbah u la ong ba lada ka sorkar kam thied ia ki jingdon kam kin sa kynnoh balei ka sorkar kam thied lada thied ruh ki ong balei ka lut, hynrei na ka liang jong ka sorkar kan leh ia kaei kaei kaba bha tam na ka bynta u paidbah, la ban biang ki bym hun ai kin pan da ka RTI ban ioh ia ka jingshai.
