Shillong, Nohprah 26: Ka kynhun Meghalaya People Committee on Aadhaar (MPCA) mynta ka sngi kala sdang ban pdiang ia ki affidavit jong ki paidbah ha ophis jong ka KSU na ka bynta jong kito ki briew kiba kwah ban weng noh ia lade na ka jingdon ia u Aadahaar.
Kino kino kiba kwah ban weng na ka liang jong ka PMCA kan dang pdiang haduh ka 28 tarik mynta u bnai kaba dei ka sngi palei. Mynta ka sngi ruh la bun kiba la leit sha ka ophis jong ka KSU ban leh ai ia ka affidavit ka jong ki bad kane kan dang beteng haduh la shi sngi kata ka 28 tarik.
Katkum ka khubor kaba la ioh la sngewthuh ba ha ka kyrteng jong kine ki paidbah ki bym kwah shuh ban don ia u Aadhaar, na ka liang jong ka MPCA kan leit ban file ia ka affidavit sha ka iing bishar ba ha khliehduh jong ka Ri India, ba ynda ka MPCA kala file ia ka affidavit kan long ka kynhun kaba 29 khyndai ha kane jingujor sha Supreme Court.
