Shillong, Naiwieng 10: Mynta ka sngi bun bah ki riew rangbah bad ki long kmie na kane ka sor Shillong kila ia poi sha ka jingialang kaba la khot da ka TUR ha jaka ieng kali ha Additional Secretariat ban pynrem ia ki riew sniew kiba la bom ia ka kong Agens Kharshiing bad ia ka Anita Sangma ha East Jiantia Hills ha Sohsrieh ha kine ki sngi.
Ha kane ka jingialang, na ka liang jong ka kur Kharshiing la kren da u Bah Amos Kharshiing, ha ka jingkren ka jong u la kyntu ia ki seng treimon sngewbha ba kin tynruh ia ka sorkar ba ka dei ban leh tyngeh ban kem ia kito ki briew kiba ia don kti ha kaba bom ia kong Agnes Kharshiing bad kaba synran ia ka ka Anita Sangma.
U tei u rangbah Kur, Kharshiing u la ong ba lada ym lah ban kem ia ki nongleh kam sniew ha kane ka kynti kaba mynta kan long ka jingeh kaba khraw ha kaba kan wan rah ia ka jingsngewsyier ha ki riew paidbah.
Kiwei ki nongkren ha kane ka sngi ki long u Naba Bathacharjee, Kong Patricia Mukhin, Bah RG Lyngdoh myntri kam poh iing ba rim jong ka sorkar jylla bad bun kiwei kiwei ki riew rangbah bad ki long kmie kiba la ia poi sha kane ka jingialang ban pynrem ia kane ka jingjia kaba la jia ia ka kong Agnes bad ka Anita.
Kitei ki nongkren baroh kila, pynpaw ia kawei ka sur ba ki pynrem jur ia kane ka jingjia bad ha ka juh ka por ki dawa na ka sorkar ba dei ban thwet tygneh ia ki nongleh kam sneiw ba dei ban kem ia ki bad pynshitom kat kum ka ain.
U Bah RG Lyngdoh, u dawa ba dei ban don ka jingtohkit halor kane ka jingjia ban lap ia ki briew kiba ia don kti ha kane ka kam bom briew, bad u kynnoh ba kane leh se ka lah ban don ka jingiadei bad ka kam tih dewiong. Dei ban tohkit ioh ka don ka jingiadei hapdeng ki politician, ki pulit bad ki nongthih dewiong.
Ha ka juh ka por ruh u ong ba kane ka jingkhang tih dewiong kala ktah ia ka ioh ka kot jong ki briew bad u kyntu ia ka sorkar ba kan ai ka jinghikai ia ki briew ba kin ioh ban im ja kpoh da ka sdang ban trei ia kiwei ki kam. Ha kane ka jingialang ki briew kiba la ia poi ban pynpaw ia ka jingsngewlem kila long palat spah ngut.
