Shillong, Jylliew 03: U Symbut Myntri Rangbah ka jylla u bah Prestone Tynsong u la ai ka jingmaham kaba tyngeh ia kito la wan phai kiba dang don ha pdeng ka quarantine ba kin pynkhein ia ki kyndon kiba la bthah bad lada dang don kiba pynkhein yn kem ia ki bad pynshitom hapoh ki kyndon jong ka ain Pandemic Act.
U Bah Prestone u la ong ba kane ka hukum kan trei kam noh naduh mynta ka sngi, lada ki don kiba pynkhein ia ki kyndon kiba la buh da ka sorkar ha ka por ba ki dang don ha ka quarantine kin shah pynshitom hapoh ka Pandemic Act ka ain jong ka sorkar pdeng.
Kane ka hukum kaba u symbut myntri rangbah ka jylla u la pynmih mynta ka sngi ha long halor ka jingkylli aiu ka sorkar ka leh ia kito kiba leh ia ka quarantine ha ki iing ki ia mih sha bar khlem da bud ryntih ia ki kyndon jong ka sorkar.
La ioh jingtip ba ki don ki jaka ba kine ki briew kiba la wan phai na sha bar jylla kiba leh ia ka home quarantine ki ia mih khlem da burom ia ki kyndon kiba ka sorkar kala dep ban bthah ia ki ha ka por ba wan phai.
U Symbut Myntri Rangbah u la ong ba kino kino kiba pynkhein ia ki kyndon kiba ka sorkar kala buh ia ki yn pynshitom ia ki hapoh ka ain Pandemic Act.
