Shillong, Nailur 08: Hadien ba ka UDP ka la pynbna ia ki 28 ngut ki kyrtong ki ban iakhun ia ka ilekshon kum ki dkhot sha ka Iingdorbar thawain ka ban long ha 2018, na ka liang jong u bah Commander Shangpliang President jong ka UDP Youth Wing Mawkyrwat Circle uba dei ruh ha ka juh ka por u dkhot jong ka UDP State Youth wing u la kitbok kit rwiang ia baroh ki kyrtong kiba la dep ban pynbna ba kin ioh ia ka jingjop kaba don burom lyngba ka jingkyrshan jong ki paidbah.
Katkum ka kyrwoh khubor ba la phah da u bah Commander Shangpliang nongialam jong ka UDP Youth wing u la ong ba, u don ka jingkyrmen kaba skhem ba ka UDP kan iohi ban bat ia u lakam jong ka jingsynshar ha u 2018 namar ki paidbah ki la ngiah bad jlep ia ka rukom synshar jong ka Congress hapoh ka jingialam jong u Mukul Sangma. “Wat ki para nongialam Congress ruh ki la ngiah katno tam lei ki paidbah bad nga don ka jingkyrmen bad Ka jingngeit kaba skhem ba ki paidbah kin ai ka jingshanniah ha ka UDP ban ialam ia ka sorkar ha u 2018” la bynrap u bah Commander Shangpliang. U la ong ruh ba ka jingiatreilang hapdeng ka UDP bad ka HSPDP kan iarap ban pynkhlain ia baroh ar tylli ki Party.
U bah Commander Shangpliang u la ong ba u don ka jingkyrmen kaba skhem ba ka party kan sa shimkhia ia ki jingeh jong ki paidbah ka jylla bad u la ong ruh ba na ka liang jongu un sa ai jingmut sha ka party ba kan shimkhia halor kiba bun ki ishu kiba ktah ia ka jylla khamtam ban kyntiew ia ka rep ka riang ban wanrah ia ki lad sengkam lyngba ki kam jngohkai pyrthei bad ki training bapher bapher bad kiwei kiwei na ka bynta ki samla bad ka bha ka miat jong ki paidbah ka jylla hi baroh kawei.
Ha ka juh ka por u bah Commander Shangpliang u la kyntu ia ki paidbah ban ai ka jingkyrshan ia ka party UDP kaba don ia ki nongialam samla kum u bah Jemino Mawthoh, Paul Lyngdoh bad kumjuh ruh kiba la ih kyrta kum u Dr. Donkupar Roy bad u Bah BM Lanong bad u kyrmen skhem ba kin lah ban leh ei ei na ka bynta ka ri bad ka jaidbynriew bad ban pyllait na ki riew shim kabu ia ka jaidbynriew.
