Shillong, Nohprah 05: Ha ka jingiakynduh kaba kyrpang ha 
ka 5 tarik December 2017, u Bah John F Kharshiing, Chairman, Ka Dorbar Ki Khlieh Nongsynshar ka Ri Hynniewtrep, bad Spokesperson, Federation of Khasi States, u la ia kynduh bad u Dr Prasenjit R Gupta, PH.D, Consul For Political and Economic Affairs, na ka office Kolkata, jong ka Ri United States of America(USA), ha kaba u Bah John F Kharshiing, u la ong ha utei u long heh jong ka Ri USA, ba ki jingeh jong ki thain lam mihngi ka long ba ki bor jong ka Ri India kim da shim khia ban pynbeit ia ki jingeh jong ki riewlum kiba long ki jaidbynriew rit paid.
U la ai nuksa kumno ba kiba bun ki Accord ki jingiasuk hapdeng ki kynhun NE ki wan hadien ka jingia um snam kaba paw ba ka Ri India ka dei ban thaw ki lynti ia kren kiba kham kyrpang ban sngap ia ki jingeh jong ki riewlum, shuh shuh u la pynpaw ia ka jingeh kiba don haduh kine ki sngi hapdeng ki NAGA, ki BODO, ki MIZO, ki TRIPURI, GARO, bad ka hok jong ki KHASI lyngba ka IOA.
U la pyntip ha katei ka jingiakynduh ia utei u longheh USA ba ka jingpynslem ka Ri India ban pyndep ia ki jingiateh bad ki jingiakular (Instrument of Accession and Annexed Agreement 17 August 1948) ka long ka daw kaba la pynmih bun ki kynrum kynram kat haduh ba ka jinglong kyrpang ka Federation of Khasi States kynthup ki Hima Khasi States kim pat paw dur hapoh ka Constitution Ri India haduh kine ki sngi. Kumjuh ki jingeh ki mih ha ka liang u pud u sam sha Assam bad u la ong ba ki Hima Khasi States ki pyrshah jur ia ka Indo -Bangla Agreement.
U Bah John F Kharshiing, u la ong ha u Dr Gupta, ba ka jingeh ki jingsynshar tynrai kum ki Dorbar ki long namar ba khlem don jingbatai kaba shai kdar hapoh ka Constitution Ri India shapang ka kyrdan(role) ka iktiar(function and powers), ka jingkitkhlieh (responsibility), jong ki Dorbar Kur, Dorbar Shnong, Dorbar Raid bad Dorbar Hima.
U Bah John F Kharshiing, hapdeng ka jingiakren u la pyntip ha utei u heh ka Ri USA ba u la shim ia ka rai ban pan ka jingkyrshan u paidbah ka 22-Nongkrem Assembly Constituency, ban mih sha ka election MLA 2018 kum shibynta ban pyrshang ban ioh lad ban ia kren halor kine ki hok jong ka Ri hapoh ka Dorbar Assembly Meghalaya.
