Shillong, Jylliew 
23: U General Secretary jong ka Hynniewtrep Youth Council (HYC) u Bah Ronertjune K Jahrin mynta ka sngi u la ong ba ka seng ka kloi ban ia tainia bad u myntri rangbah ka jylla bad ka kynhun myntri jong halor ka jingkam ka sorkar ba ym lah ban pyntrei kam ia ka Inner Line Permit ha ka jylla. Lada ka sorkar ka don ka mon ka lah ban pyntrei kam ia ka ILP.
Haba kren ha ki nongthoh khubor mynta ka sngi ha Shillong Press Club u tei u nongialam jong ka seng HYC u la ong ba ka seng kala dep thoh lai sien lynter ba ki kwah ban ia kren bad u myntri rangbah hynrei na ka liang jong u myntri rangbah haduh mynta um shym la ai jubab ei ei ruh em bad kane ka dei ka jingbym khien briew ka jong u la kynnoh u Bah Robert.
La ong ba ka seng kala dep ban ai ia ki 14 tylli ki mat jingdawa jong ka seng sha u Dr Mukul bad kawei na kita ka long ba ka sorkar ka dei ban pyntrei kam ia ka ILP ha kane ka jylla bad lada ka sorkar ka mon ka lah ban leh. U la ong ba ka don ka jingiapher hapdeng ka ILP bad ka Meghalaya Residential Safety and Security Act.
Ka jingkam jong u myntri rangbah ba ka MRSS Act kan long kum ka ILP ka long kaba bakla shibun. Hapoh ka ILP u briew ba kwah ban wan sha kane ka jylla u hap ban apply shuwa bad ha ka MRSS Act pat ka long ba u briew u wan shuwa bad kam don ia ka bor ba ki District Task Force kin kem ia ki bym biang kot biang sla. Ka seng ka dawa ba dei ban pyntrei kam ia ka ILP ha ka jylla.
Haba ia dei bad ka lynti rel ka nongrim jong ka seng ka shai bha kdar ba ka seng kan nym lah ban pdiang ia ka lynti rel sha ka Ri Khasi Jaintia katba ka sorkar kam pat lah ban pynbiang ia ki lad jingiada na ka jingwan tuid jong ki briew kiba na bar. Ka HYC ka dawa ba u myntri rangbah u Dr Mukul u dei ban khot ia ka jingiakren ia ki seng bhalang baroh ban ia kren halor ka lynti rel kyntup ia ka KSU.
Haba ia dei bad ka jingthwet jong ki pulit ia ki khun samla jong ka Ri Khasi Jaintia, u Bah Robert u la ong ba kane ka jylla kam dei ka jylla ba la synshar da ki pulit, ka dei ka jylla ba la synshar da ka synshar paidbah haba ka don ka jingeh hap ban ia kren, u Bah HDR Lyngdoh myntri kam poh iing u la dei ban hukum ban sangeh noh ia kane ka jingthwet ia ki samla jong ka Ri Khasi Jaintia.
