Shillong, Jymmang 06: Ka Federation Of Khasi Jaintia bad Garo People (FKJGP) North Khasi Hills District ka ai khublei kyrpang ia ka sorkar MDA hapoh
ka jingialam jong u Conrad K. Sangma kum u Myntri Rangbah jong ka Sorkar Jylla halor ka sienjam ban tei noh ia ka khyrdop khynra mynder lane kita ki Entry & Exit points khamtam eh ha ka them Ri-Bhoi kaba long ka lynti bah jong ki briew kiba wan lyngba jong ka jylla Assam.
Ka Seng kala angnud laslem ban iohi ia ka jing shimkhia na ka liang jong ka sorkar ban teh lakam bad ban pyrkhing ia ka jingrung jingmih laitlan jong ki bar jylla bad ki mynder sha kine ki Ri Lum Khasi kiba ieit eh jong ngi ha ki rukom kiba pher bapher.
Kumban shu pynkynmaw hangne ba ka Central Executive Committee (CEC) jong ka Sengkmie dang ha kine ki khyndiat taiew kala byrngem ba kum ka Seng kam banse ban shim da kiwei pat ki sienjam watla kadei ban shim da ka rai kaba tyngeh ban pynlong ia ki jingiakhih kiba jur lada ka sorkar Jylla kam sdang satia ban pyni noh da ki kam.
Ka CEC jong ka FKJGP kala ong ba ka sorkar ka dei ban tei iaki khyrdop kynra mynder Entry & Exit points hapoh jong u bnai May 2019 namar ka seng kam lah shuh ban ap ban ban shu shong klikti halor ka jingrung bad jingmih Laitlan jong ki Mynder bad ki Bar Jylla.
Ka FKJGP North Khasi Hills District ka sngewthuh shaikdar ba hooid katei ka kyrdop kaba la sdang pyntrei shait shait mynta ha ki bynta jong ka shnong Umling kaba dei ruh ka jaka jong ka sorkar jylla kadei kaba tang shipor hynrei kan iarap shikatdei pat ban tehlakam ban khanglad ia ka jing wantuid kyrthlep jong ki mynder sha kane ka jylla.
Kumta ka seng ka kyntu ia ka sorkar ba kadei ban pynsted ruh katba lah ymtang ia ka jingtrei hynrei ia ka jing treikam jong katei ka khyrdop khynra mynder Entry & Exit points khnang ba kan long ia ka jingiada iaka jaitbynriew na ka jing shah taplep ha ki mynder.
Ka FKJGP North Khasi Hills District ka ai khublei kyrpang ruh ia ki Noingialam jong ka FKJGP Sengkmie bad kumjuh ruh ia ki Nongialam jong ki 13 Seng kiba la trei shitom ban buddien khlem shong thait ban iai dawa na ka sorkar halor ka jing treikam pura ia ki khyrdop khynra mynder Entry & Exit points.
