Shillong, Naitung 20: Ka Federation of Khasi State (FKS) hapoh ka jingialam jong u Bah John Kharshiing ka pynpaw ka jingsngew khiah halor ka jingbym pynlong ia ka Dorbar Hima Mylliem mynta la bun bun snem. Ka long thik kumba khlem ioh Dorbar Shnong ne Dorbar Raid.
Kumta Ka Dorbar Ki Khlieh Nongsynshar Ka Ri Hynniewtrep, bad Ka Federation of Khasi States, ka da pynpaw ka jingsngew nguh ia u Bah Adelbert Nongrum, MLA & MDC u la buh kyndon ia ka KHDA ban lum Dorbar Hima Mylliem.
Kumjuh ruh ka Dorbar ka sngew kmen ban iohi ba u Bah HS Shylla, CEM, ka KHADC, u la pynsngew ia ka jingdonkam ban pynlong Dorbar Hima ha ki Hima bad khamtam ban lum kyrkieh ia ka Dorbar Hima Mylliem. Kaba dei ka pdeng shnong Jong ka Ri Khasi.
Lada ki bor KHADC kim lah ban lum Dorbar Hima Mylliem ka long kumba la khien duh ia katei ka jaka sha ki bor ba nabar. Kumta ha ka 17 tarik July 2018, ka Federation of Khasi states ngi, la phah ia ka shithi Sha u Bah RN Syiem, Acting Syiem Hima Mylliem ban shim khia ban Lum kyrkieh ia ka Dorbar Hima Mylliem ha ryngkat ki Nongsynshar ha ryngkat ki Khun ki Hajar naduh Shnong, Raid haduh Hima bad ia ka juh ka shithi la phah copy sha u Chief Executive Member, Khasi Hills Autonomous District Council, Shillong.
