Kmen ki paidbah ka shnong Umblai ba ioh ia ka jingkieng iaid kjat na u MDC Bah Banteidor

BanteidorShillong, Risaw 07: Ka long ka sngi kaban sah jingkynmaw na ka bynta jong ki Paidbah Nong Shong Shnong jong ka Shnong Umblai kaba hap ha Mawkynrew Constituency namar ki jing angnud kiba ki Nong Synshar Shnong bad kumjuh ruh ki paidbah Nong Shong Shnong ka la urlong lyngba ka jingtrei bor bah jong u Bah Banteidor Lyngdoh, MDC Mawkynrew Constituency ban ai ka jingshakri kaba khuid ha ryngkat ka jing wanrah ia ki kam pynroi lyngba ka jing plie paidbah ia ka Public Toilet ia kaba la  mang 1 Lak Tyngka bad kumjuh ruh na ka bynta ka Footpath kaba la mang 50 hajar tyngka lyngba jong ka Special Assistance Schemes.

La plie paidbah ia ka Public Toilet bad kumjuh ruh ia ka lynti iaid kjat ha ka jingialang kaba iphuh iphieng ha kaba la ia don ryngkat ruh naduh ki Riew Rangbah, Ki Longkmie longkpa, ki khun samla jong ka Shnong. Kiba la ai jingkren ha katei ka sngi ki kynthup ia u Bah Maron Suting, Sordar Shnong Mawlat uba dei ruh ha kajuh ka por u Secretary jong ka Raid Mawlat, kiwei pat ki Riew Rangbah kiba la ai jingkren ki kynthup ia u Bah Dli Kshiar bad kumjuh ruh na u Bah Snor Suting.

Baroh ki Nongkren ha katei ka sngi ki la pynpaw ka jing sngew nguh kaba khraw shi katdei eh ia u Bah Banteidor Lyngdoh, MDC Mawkynrew Constituency uba la pynurlong ia ka jingangnud ban da ia ka burom ka ijot jong ka shnong ka thaw namar kila ong ba baroh shi katta ka shem jingeh shi katdei eh namar ka jing bym don satia ka Public Toilet khamtam eh haba ki wan ki briew Sorkar bad kumjuh ruh ki briew kiba na bar shnong ban leit bar leit lait, hynrei mynta pat lyngba ka jing ioh ia kane ka Public Toilet kan long ka jingkyrkhu kaba khraw ban wanrah ruh ia ka khuid ka suba ha ki rud ki kiar bad ki sawdong sawkun jong ka Shnong, ha kaba iadei pat bad ka Lynti iaidkjat (Footpath) ki la pynpaw ba kan pynsuk ia ka iaid ka ieng bad kumjuh ruh ha kaba iadei bad ka kit ka bah khamtam eh ha kip or lyiur.

Ha katei kajuh hi ka sngi hadien ba la dep ban plie paidbah ia ka Public Toilet bad ia ka lynti iaid kjat (Footpath) ha ka Shnong Umblai u MDC ka thain u la hiar ruh sha ka shnong Mawkria ban Plie Paidbah pat sa ia ka Jingkieng (Footbridge) ha ka Dong Wahshkot ia kaba la  mang 2 Lak Tyngka bad kumjuh ruh na ka bynta ka Footpath kaba la mang 1 Lak Tyngka.

La sakhi ia ka jing plie paidbah ia ka Jingkieng (Footbridge) bad kumjuh ruh ia ka Lynti iaidkjat (Footpath) ha ka shnong Mawkria da ka jing ia donlang da ki Riew Khmat jong ka Thain, Ki Riew Rangbah, ki Long Kmie bad kumjuh ruh ki Khun samla jong ka Shnong Mawkria. Ki Nongkren ha katei ka sngi ki la pynpaw ruh ba lyngba ka jing ioh ban plie paidbah ia kane ka jingkieng (Footbridge) kaba don ha ka Dong Wahshkot kan long shisha ka jingkyrkhu kaba khraw namar kalong kaba donkam haduh katta katta bad ka long ruh kum u Budlum na ka bynta jong ki Paid Nongrep bad kumjuh ruh na ka bynta jong ki Paidbah Nong Shong Shnong.

Haba kren kum u Kongsan ha kitei ki ar tylli ki jingialang paidbah ha katei kajuh ka sngi na ka liang jong u Bah Banteidor Lyngdoh (Bah Pai), MDC Mawkynrew Constituency u la ong ba kum u Nongmihkhmat ha i bor iba rit kum u MDC, u la pyrshang ban ai ia ka jingshakri kaba janai tam bad kaba khuid kaba suba ban sam ia baroh ki schemes haba shit haba shai khlem ka jingleh shiliang khmat iano iano ruh na ka bynta ka jingbit jingbiang jong ka Constituency hi baroh kawei, ha kaba u la bynrap ruh ba um kwah ban put turoi ialade hynrei to ai ba ki kam kin kren khamjam ban ia ka ktien.

Na ka liang jong u Bah Banteidor Lyngdoh  u la ai khublei kyrpang ruh ia u Sordar jong ka shnong Mawkria lem bad ia baroh ki Dkhot jong ka Executive Committee jong ka shnong Mawkria wat la um lah satia ban ia don ryngkat ha katei ka sngi hynrei u la ong pat ba ka mynsiem jong ka jing iatreilang pat ka long kaba kham kongsan ha kaba u la kyntu ruh ia ki Paidbah ba kidei ban sumar bad pynneh pynsah ia kine ki matti namar ka jing myntoi kadei ka jong ki hi.

Kiwei pat ki Riewkhmat kiba la ai jingkren ha katei ka sngi ki kynthup ia u Bah Kran Suting, President PDF Mawkria Primary Unit, U Bah Spor Sting, Secretary PDF Mawkria Primary Unit, ha kane kajuh ka sngi la pynskhem ruh ia baroh ki Nongkitkam jong ka PDF Mawkria Primary Unit bad kumjuh ruh ia ki Nongkitkam jong ka Women’s Wing PDF Mawkria Unit da u Bah Banteidor Lyngdoh (Bah Pai), MDC Mawkynrew Constituency uba dei ruh ha kajuh ka por u Kyrtong jong ka Seng sain pyrthei PDF na ka bynta ka Election MLA 2018 na Mawkynrew Constituency.

 

 

What Next?

Recent Articles

Leave a Reply

Submit Comment
*