Shillong, Iaiong 02: Ki ar tylli ki seng ka KSU bad ka HYC kila kner ia la ki kti jong ki ban iarap ia ki long iing kiba duk ha kane ka por ba don kane ka jingpakhang ban ialeh pyrshah ban nym ailad ba u COVID-19 ban ioh rung ha kane ka jylla Meghalaya.
Ha kane ka jingpakhang, kala ktah ia shibun ki long iing kiba duk namar ba kim ioh leit ban bylla ban sngi namar ki hap ban shong ha iing bad kane kala wanrah ia ka jingeh ia kiba bun ki long iing, ban iarap ia ki ka seng KSU bad HYC kila leit ban ai jingiarap ia ki long iing da u Khaw bad kiwei ki marbam.
Ka seng HYC jong ka Mawlai kala leit ban ai jingiarap ia ki 12 tylli ki long iing kiba don ha Mawlai Umjaiur bad Mawlai Mawdatbaki, ka seng kala ai khublei ia ka kong Bansara Sohtun kaba la noh syniang da ka pisa ban thied khaw ban sam sha ki long iing kiba duk. La ong u Bah Danny Mukhim Vice President ka seng HYC Mawlai.
Na ka liang jong ka seng KSU Mawlai Circle kala leit ban ai jingiarap da ki Marbam ia ki ar tylli ki jaka Ri khunswet kiba don ha Mawlai, kine ki jaka ri khunswet ki long ka Ferrando Transit Shelter Home kaba don ha Mawlai Mawroh bad ba pyniaid da ki Sisters ka balang Katholik bad ka Spring of Hope kaba don ha Mawlai dong Pata ba pyniaid da ka Spring of Hope Society.
Ka KSU ka la ai jingiarap da ki mar bam kiba kynthup ia u khaw, u phan, u dai, u piat, ka umphniang bad kiwei kiwei. Kaba sngewtynnad ka long ba ki dkhot ka KSU Mawlai Cirlce ki la bud pura ia ki jingbthah ka sorkar lyngba ka tnad ba dei peit ia ka koit ka khiah ha kaba ia dei bad ka ‘social distancing’,ka jingsait ia ki kti bad ka jingdeng ia ki mask.
Ki dkhot ki la shim khia bad leh janai ba kan ym don kano kano ka jingia ïeng marjanan para briew ha kine ki iing ri khunswet bad kim shym la ia khublei kti ruh markylliang kum shi bynta ban ym ailad ia u Corona virus ban saphriang.
Kane ka jingangnud jong ka KSU Mawlai Circle la lah ban pynurlong mynne ka sngi hadien ka jingtrei shitom ki dkhot la bun taiew ban lum ban lang ia ki jingai jingiarap. Ka seng ka ngeit skhem ruh ba kiwei ki tnad tnad Teikam kin sa lah ban noh synniang lem sha kiwei pat kiba shem lanot lyngba ki jingtrei shitom jong ki.
Ka KSU khatduh khatwai ka pan ruh ia ka jingkyrshan na baroh ki paidbah ka Bri u Hynniewtrep ba kin krer lem ia ki kti jongki ban pynnoh lem ki jingiarap sha ki longïing longsem kiba kyrduh bad jynjar ha kum kane ka khep, ba wan ka nem sniew bad ngin buh ruh ha ki jingduwai ia ka jaitbynriew khasi jongngi bad ia ka pyrthei hi baroh kawei ban pyllait noh na kane ka khlam ba shyrkhei, la ong u samla Macdonald Jitem Publicity secretary KSU Mawlai Circle.
