Shillong, Naitung 12: Ka jingiakynduh lang ba lai sngi hapdeng ki Shipai BGB jong ka Bangladesh bad ki BSF jong ka Ri India ha ka kyrdan Inspector Genenral kala sdang ha Shillong mynta ka sngi, ha kaba 23 ngut ki heh jong ka Ri Bangladesh kila poi sha kane ka jingialang ia kaba la ialam da u M Zahid Hasan, ndc, psc, Additional Director General, Region Commander, North East Region, Sarail, Bangladesh.
Katba na ka liang jong ka Ri India la ialam da u U C Sarangi, IPS , Inspector General BSF, Tripura ia kaba la don lang u Inspectors General na ka jylla Meghalaya bad kiwei ki heh kiba dei na Kolkatta Special DG jong ka Eastern Command, u Dy. Inspectors General na Delhi ba dei peit ia ka jylla Meghalaya, M&C bad Tripura Frontiers lem bad kiwei kiwei ki heh jong ka sorkar pdeng.
Kane ka jingialang ka long ban ia kren kumno ban pynneh pynsah ia ka shong suk shong sain ha khappud hapdeng kine ki ar tylli ki Ri, ia ka jingialang kaba la dep la pynlong ha at Sylhet, Bangladesh na u Naiwieng 2016 bad mynta la pynlong ha Mawpat Shillong.
Ha kane ka sngi sdang jong ka jingialang, la ia kren ia ki kam beain ha khappud jong kine ki ar tylli ki ri, na ka liang jong ki BSF kila buh ha khmat jong ki BGB ba ka don ka jingkhaii beain, kum ka jingiakhaii masi, Ksiar, Drugs, pisa thok bad la ia kren halor ka jingker ksainar kaba tang shisyrtap bad kiwei ki kam pynroi.
Katba na ka liang jong ki BGB kila ban jur ia ka phang halor ka jingshah siat jong ki riew paidbah ka Ri Bangladesh ha ki paidbah jong ka Ri India ha khappud bad ka jingkem ia ki briew jong ka Bangladesh ha khappud bad ka jingrung beain jong ki nong India sha Bangladesh ban leh ia ki kam khaii beain.
Kine ki kynhun shipai na baroh ar liang ki ia kren halor ki kam beain ha khappud bad kila ia mynjur ban ia treilang ban the lakam ia kine ki jingsniew kiba lah ban mih ha khappud hapdeng kine ki ar tylli ki Ri.
Ha kane ka jingialang ka Bangladesh kala kyntait ba kin don ki seng lehnoh na kane ka thain ha ka Ri Bangladesh, ha ka juh ka por kila ai ka jingkular ba lada don ruh ka Bangladesh kan nym ailad bad kin pyntip sha ki bor jong ka Ri India, baroh ar liang kila ia kubur ba kin ia treilang ban the la kam ia ki kam sniew.
