Shillong, Naitung 01: Mynta ka sngi ar ngut ki heh jong ka Atomic Mineral Directorate (AMD) u Dr Rahul Banerjee Deputy Regional Director bad u Sandeep Hamilton Regional Director kila kular sha ka KHADC ba naduh mynta ka sngi kin sangeh noh ia ka jingksam marpoh khyndew ha ka jylla Meghalaya baroh kawei.
Ka jingwan jong ki heh jong ka AMD sha KHADC ka long hadien ba ki bor jong ka District Council kila khot hajir ba ka dei ban pynshai na ei kala ioh bor ba leit ksam Uranium sha Mawthabah bad Nongbahjynrim kaba la wan rah ia kane ka jingiaklumar hapoh Ri Khasi.
Haba la kut ka jingiakynduh hapdeng ki heh jong ka AMD bad ki bor jong ka KHADC, na ka liang jong u Dr Rahul Banerjee Deputy Regional Director, u la ong ba katkum ka AMD Act jong u snem 1962 ban jurip ia ka jingdon jong ki marpoh khyndew ha baroh jong ka Ri India don kam tang ia ka jingbit na u khlieh jong ka shnong.
Haba ia dei bad kane ka jingleit ka jong ki ban ksan ia ki marpoh khyndew ha ka thain Domiasiat ka dei halor ka jingbit kaba ki la ioh na ka u Sordar jong ka shnong Mawthabah kaba la ai sha ka AMD ha ka 04 tarik Iaiong 2018. La iathuh ba ia ki ophis kala ai ka jingpyntip sha u Chief Secretary jong ka jylla bad sha baroh ki Chief Secretary jong ki jylla kaba ki leh ia kane ka jingksam ia ki marpoh khyndew.
Haba jubab ia ki jingkylli, u la ong ba kimtip jingtip ei ei ba lada don kam ban ksam ia ki marpoh khyndew ha kane ka jylla hap ban shim jingbit shuwa na ki District Council, kane ka dei ka jingbakla kaba kila leh namar ki but ia ka ain jong jong ka AMD 1962 kaba ong dei ban shim jingbit tang na u khlieh jong ka shnong.
U Dr Rahul Banerjee Deputy Regional Director jong ka AMD, u la ong ha dien ka jingiakren bad ki bor jong ka KHADC, na ka liang jong ka AMD kala ai ia ka rai ban kin sangeh noh shisyndon naduh mynta ka sngi ia kane ka jingksam ia ki marpoh khyndew ha kane ka jylla Meghalaya.
Na ka liang jong u Bah Latiplang Em ba dei peit ia ki kam khyndew ha KHADC, u la ong ba ha kane ka jingiakren bad ki heh jong ka AMD kiba la wan mih mynta ka sngi kumba ka KHADC kala khot ia ki, na ka liang jong ka District Council kala pynshai sha ki ba ka khyndew ka hap hapoh ka jingpeit jong ka District Council kumta haba ki kwah ban leh noh kano ka kam ki dei ban ioh ia ka jingbit na ka District Council.
U la iathuh ba la shai ka sngi na ka liang jong ka KHADC kan leit sha Mawthabah ban lap ia ki jingshisha bad lada lap ba ka AMD ka dang beteng ia ka jingtrei kam ka jong ka na ka liang jong ka KHADC ka don ia bor ban knieh ia ki kor ki bor jong ka AMD namar kala iaid lait na ki bor jong ka District Council.
