Mairang Naitung 17: Ka Hima Nongkhlaw mynta ka sngi ryngkat ki paidbah ka Ri Khasi kala pyndon burom ia ka sngi iap ba 182 snem jong u Syiem ka Hima u Tirot Sing Syiem u ba la khlad ha bynti ha Dacca hapoh jong ka Ri Bangladesh kaba mynta.
Ha kane ka sngi u myntri ba dei peit ia ka riti dustur jong ka jylla u Bah Ronnie V Lyngdoh u la long u kongsan. Haba kren ha kane ka jingialang na ka liang jong u myntri u la kular ia ki paidbah jong ka Hima Nongkhlaw ba ka sorkar kan sa shna ia u maw mot jong u Syiem Tirot Sing bad yn sa plie ia u ha ka sngi rakha ia ka sngi iap ha u snem ban wan. Ha kaba ki paidbah na ka jylla bad kum juh na sha bar ka jylla ki lah ban wan jngoh ia une u riew khraw u ba la len lade ban ia khun pyrshah ia ki phareng.
Ha kane ka sngi na ka liang jong u Bah Lyngdoh u la kyntu ia ki nongialam bad ia ki paidbah ban bud ia ka nuksa jong u ne u nongialeh laitluid u ba la ieng hala ka jong ka nongrim kaba skhem. U la ong ba na une u khla wait lah ban shim bun ki nuksa ban don ia ka mynsiem ieit ri.
U Bah Kennedy Khyriem parliamentary Secretary ba dei peit ia ki kam jngohkai pyrthei ha ka jingkren ka jong u la ong ba ka long kaei kaei kaba don kam ban but nuksa jong u ne u riew khraw ban poi sha ka thong kham tam kum ki samla pule. Na ka liang jong KSU Mairang ha kane ka sngi kala ai burom ia ki samla kiba la pass bha ha ki exsamin ka jong ki.
Ia kane ka jingleh burom la pynkut da ki jingrwai bad ki jingshad tynrai kaba la pynlong ha pdeng ki khynnah skul bad ki college jong katei ka thain, ha kane ka sngi kala don ruh ka jingiakop siat khnam ia kaba la wan ban ia shim bynta da ka Mairang Presbyterian School, St Thomas secondary School, Mairang Presbyterian Science College, Tirot Sing Memorial College, Mairang Presbyterian Academy School, Mairang Presbyterian English Secondary School and Khatsaw Phra Secondary School.
Ia ka jingrakhe ia kane ka sngi la pyniaid da u Syiem jong ka Hima Nongkhlaw u Pa’im PM Syiemlieh, ha ka jingiadon lang ki ba khraw bartei jong ka hima, u syiem jong ka Hima Nongstoin u Pa’im Pherla Sing Syiem, bad ki MDC jong ka KHADC.
