Shillong, Kyllalyngkot 17: U Controller Examination jong ka Meghalaya Board of School Education (MBOSE) ha ka jingiakynduh bad ki dkhot jong ka seng Hynniewtrep National Youthfront (HNYF) mynta ka sngi u la kular ba ha u snem 2019 yn sa buh ia ka jaka thoh eksamin matrik ha Umsohlait.
U bah Marcus Marten President jong ka HNYF North Region haba kren ha ki nongthoh khubor mynta ka sngi ha Shillong Press Club u la ong ba ha ka jingiakynduh bad ki dkhot jong ka seng na ka liang jong u Controller Examination jong ka MBOSE u la kular ba na ka bynta ka eksamin matrik ha u snem 2019 yn sa buh noh ha Umsohlait.
U bah Marius Jyrwa Chairman jong ka Synjuk ki Rangbah shnong ka thain Mawhati, u la ong ba ha u snem bala dep kila leit ban dawa na ka MBOSE ban buh ia ka jaka thoh eksam Matrik hapoh jong ka thain Mawhati ryngkat ka jingiarap jong u MLA u bah Juluis Dorphang, hynrei ka jubab kaba la ioh ka long ba ym pat lah ban buh ia ka jaka thoh eksam namar ym don Police station.
Da ka jingtrei jong u MLA ia ka police station la lah ban plie ha Umsohlait bad dei halor kane ka nongrim ba mynta ka sngi hapoh ka jingialam jong ka HNYF kila leit ban dawa biang na ka MBOSE ban buh noh ia ka jaka toh Eksam matrik ha thian Mawhati, ia kaba la ioh ia ka jingkular ba ha u snem 2019 kin sa buh. Na ka bynta jong mynta u snem 2018 ka dei ka eksam jong u snem 2017 ia kaba kim lah ban leh ei ei shuh namar la dep ban pynbeit.
Ka thain Mawhati ka don saw tylli ki Secoundary School, ka Syndong Korhadem Secoundary School, Sakhit Secoundary School ha Umtrai,St Francis D Asisi Secoundary School ha Umsiang bad ka St Vianey Secondary School ha Umsohlait, bad kaba ki kwah ban buh ia ka jaka toh eksam matrik kan dei ha Umsohlait.
La iathuh ba ha kine ki snem baroh kiba la leit noh ki samla pule jong ka thain ka thain kiba thoh martik ki hap ban leit sha Umsning, Nongpoh bad sha duh Byrnihat ruh. La ong ba man u snem ki samla ba ialeh matrik na katei ka thain ki don palat ia ka 200 ngut.
