Shillong, Iaiong 30: Mynta ka sngi ki dkhot jong ka KSU bad FKJGP jong ka Mawlai kila leit ban ia kynduh ia u General Manager, u D Devan jong ka Food Corporation jong ka Ri India (FCI) kaba don ha Mawlai Mawroh ban kyntu ia kane ka ophis ban thung kam u wei na kiba ha iing jong u Bah Dismarlin L.Lyngkhoi bala khlad ha ka jingshah shoh ha ki draibar trok katba u dang don ha ka kam ha kudam jong ka FCI ha Khanapara.
Haba kren ha u SP News Agency ha dien ka jingiakynduh bad ki heh jong ka FCI u Bah Khrawkupar Nongsiej president jong ka FKJGP Mawlai bad u samla Rapborlang Nongrum general secretary jong ka KSU Mawlai kila iathuh ba ka jingwan jong ki ban ia kynduh ia ki heh jong ka FCI ka long ban kyntu ba kin ai kam iwei na ka iing jong u Bah Dismarlin u ba la khlad ha ka jingshah leh dusmon ha ka por ba u don ha ka kam.
Ha kane ka jingiakren na ka liang jong u General Manager u la kren shai ban thung kam na ka liang jong u un nym lah namar ka jingthung kam ka long na Delhi, na ka liang jong ki kin sa thoh sha Delhi bad phah lang ia kane ka jingthoh kaba la ai na ki ar tylli ki seng ban pynsngew sha ki bor ba halor haba ia dei bad kane ka jingkyrpad kum ka jingsngewlem ia kane kane ka iing ka sem.
U Bah Khrawkupar u la ong ba na ka liang jong ka KSU bad ka FKJGP kan budien ia kane khang ba kan long ka jingiarap ia kane ka long iing kaba la duh noh ia u nongpyndap pynbiang ia ka iing ka sem kaba u la pyndep ia ka kamram jong u kum u nongtrei jong ka FCI u ba dei na ka tnad Home Guard.
Kum ka kynhun la shai ka sngi kinleit ruh ban ia kynduh ia u Commandant jong ka tnad home guard ban kyrpad ia ka ophis kaba u trei ba kim pyrkhat lem ban pynrung kam u wei na ka iing namar kane ka long iing ka don ha ka jingeh na ka daw jong kane ka jingjia kaba sngewsih bad kin kyntu ruh ba ka dei ban pynkloi ban siew ia kaei kaba u dei ban ioh na ka ophis.
Ha kane ka jingiakren la don lang ruh u OC jong ka Mawlai police station u Bah O Syiemlieh, ka khun bad ka kurom jong u Bah Dismarlin bam kwai ha dwar u blei ha kane ka jingiakynduh ia ki heh jong ka FCI mynta ka sngi ha ophis kaba don ha Mawlai Mawroh.
