Shillong, Nailar 02: Mynta ka sngi ki nongialam jong ka KSU, hapoh ka jingialam u samla Readian S Nongrum kila leit ban ia kynduh ia u registrar jong ka NEHU u Dr J N Nayak ban ia kren halor ka jingpynslem jong kane ka skul bah ban pynmih ia ka reslot BA jong ka Sixth Semester.
Haba kren ha ki lad pathai khubor ha dien ka jingia kynduh ia u registrar u samla Readian S Nongrum u la ong ha kane ka jingiakren la sngewthuh ba ka jingslem kam dei na ka daw jong ka NEHU hynrei ka dei ka jingpynpoi slem ia ki jingjubab jong ki samla pule na ki kolej kaba ki phah ban korek.
Ha kane ka jingiakren na ka liang jong u Registrar u la iathuh ba kin pyrshang ban pynmih ia ka reslot jong ki samla pule mynta ka sngi namar ia ki jingjubab jong ki samla pule ki don ki kolej kiba dang pynpoi ha ka miet sngi palaei.
Haba ia dei bad ka jingioh ban rung klass sha NEHU na ka bynta ka MA, la ong ba na ka liang jong ka NEHU kala pynjlan ia ka por jong ki samla pule ba ki lah ban thep phom haduh ka 10 tarik mynta u bnai, ha ka jingshisha kane ka jingthep phom kan kut ha ka 5 tarik mynta u bnai.
U Samla Nongrum ba dei na ka Education cell jong ka KSU ha kane ka jingiakren u la ong ia u Registrar ba ka skul bah ka dei ban peit bniah bha ha kaba prung ia ki mark ba ki khynnah ki ioh ba kan nym mih sa kawei pat ka jingeh ia ki samla pule ha kane ka jingialeh ban pynmih noh ia ka resolt.
Ha kane ka sngi ki nongialam jong ka KSU ha ryngkat ki nongialam jong ka NEHUSU ruh kila ap ha ophis jong u Controller Examination ban ia kynduh ia u ban ia kren shuh shuh halor ka reslot jong ki samla pule.
