Shillong, Naitung 21: Ki nongkhaii tuh Masi na Meghalaya sha Bangladesh kila pyrshang la kat lah kat iai ban phah tuh ia ki masi na ki jaka ba pat ker ksianar shiah, hynrei da ka jinglong ba la peitngor jong ki shipai BSF la lah ban ioh kem.
Mynta ka sngi ki shipai BSF kila ioh ban kem 27 tylli ki Masi na Iew Thymmai kaba don hapoh East Khasi Hills District kaba hap hapoh jong ka Pynursla Police Station, ia kine ki masi la ioh ban kem da ki shipai BSF katba ki nongkhaii ki dang thmu ban phah sha Bangladesh.
Ha kane ka juh ka sngi la ioh ban kem ruh 20 tylli ki masi na Ganganagar kaba hap hapoh jong ka South West Khasi Hills District, kane ka jaka ruh ka dei ka jaka ba laitlan ha kaba ka jingker ksainar shiah kam pat lah ban pyndep. Ki shipai BSF haba ki la iohi ia ki briew ryngkat bad ki masi kila ker kut bad kem ia ki.
