Shillong, Naitung 05: Ka Annual General Meeting jong ka Meghalaya State Olympic Association, (MSOA), kala long ha ka sngi Saitjain. Ia katei ka AGM la pyniaid da u Bah Banteidor Lyngdoh, President, MSOA, & Minister Sports & Youth Affairs, Government of Meghalaya, ha ka jingiadon lang ryngkat u Bah John F Kharshiing, Working President, Shri. Chiranjib Choudhury, General Secretary, ki Vice President, Joint Secretary, bad ki President Secretary jong ki affiliated State Sports Associations.
Ka AGM ka la ioh ban ia tai ia kren bad mynjur ia ka kaiphod jong ka AGM barim, ki Audited Accounts; ka kaiphod 2017-2018 jong u General Secretary’s; ka Mang tyngka 2018-2019; ka jingthung ia u Auditor 2018-2019; Ka program Sports Calendar jong ka MSOA;
U General Secretary, Shri. Chiranjib Choudhury, haba pule ia ka kaiphod, halor ki kam kiba bun, kum ka Annual Sports Calendar MSOA ban pynlong ia ka Meghalaya Games, ka 23 tarik June Olympic Day, ka Seminar halor ka phang Sports kum ka lad ioh kam ioh jam, bad ha katei ka jingiakren la mih ka jingai jingmut ba ka MSOA kan ai jingmut sha ka tnad Sports ban pynlong ia ka jingai kusnam ka jingle burom ia kiba jop medal ha ka sngi Olympic day, katei ka jingialang ka la tyrwa ba ka Ex-Council MSOA kan bthah ia baroh ki Association ba kin ai ia ka program ka thong ialehkai shi snem jong ki sha ka MSOA ban ioh sngew hakhmat ka AGM.
Ha ka jingkren plie ha katei ka jingialang u Bah Banteidor Lyngdoh, President, MSOA & Minister Sports & Youth Affairs, Govt of Meghalaya, u la ai khublei ia ki State Associations bad ia ka MSOA, kiba la trei shitom ban sei ia ki rang kynsai kiba la wanrah ka nam ka burom ia ka jylla baroh kawei. U la ong ba ka Sorkar Jylla ka la shim ia ka rai ba skhem ba dei ban pynlong ia ka XXXIX (39th) National Games 2022, kaba jop kum ka lad kaban kyntiew ia ki samla jong ka jylla, bad u la ong ba ka jingpynbna ia ka Meghalaya National Games Organising Committee ba la khlieh da u Chief Minister, bad ma u kum u Deputy Chairman, ha ryngkat ki Ministers, ki khlieh jong ki Tnad Sorkar bad ki nongialam jong ka MSOA, ka long kawei na ki kam kiba la iaid shakhmat, bad ki la shim khia ban buddien ia kane ka phang katkum ka por ba la buh(timeline).
U Minister Sports, u la pyntip ba ka Land committee kaba la khlieh da u Chief Secretary, hashen kin sa phah ia ka kaiphod halor ki jaka pynlong Games Village ha Shillong bad Tura ba ruh halor ki jaka shna Stadium bad hadien kata ka Sorkar Jylla bad ka Meghalaya NGOCC 2022 kin sa shim ia ka rai kaba khatduh halor ki jaka pynlong National Games.
Halor ka jingeh ba ia kynduh ki State Sports Associations mynta ar snem, u Minister Sports u la pyntip ba ka tnad Department of Sports, ha shen kin sa pynlait ia ka grant-in-aid, sha ki State Sports Associations bad u la kular ba ka Sorkar Jylla bad ka tnad Sports, kin sa shim ia ki lad ki lynti ban kyrshan ia ki kam pynroi ha ki kam ialeh Sports. U President, MSOA uba long ruh u Minister Sports, u la pynpaw ka jingiaroh ia ka Working Group tnad Sports bad ki dkhot jong ka, kiba la shong bun sien ban bishar bniah ia ka Draft Sports Policy bad u ong ba u la ioh jingtip ba ka Working Group ka la ia kynduh ruh bad ka tnad Health Dept, halor ka phang kumno ban kynthup, pynbiang pynjanai ia ka kam Sports Medicine bad katei ka Working Group ka la ia kynduh ruh bad ka tnad Education Dept halor kumno ban ai pli lad bad ban ai jingmyntoi ia ki samla pule kiba wan shakhmat ha ki kam ialeh kai Sports, ka jingdonkam kyrkieh ia ki Physical Instructors.
Ki nonghikai, hapoh ki schools, Colleges, Universities, ki jaka ialehkai, ki tiar ialehkai, hapoh ki jaka pule (Educational Institutes), bad kiwei kiwei ki tnad, bad u la ong ba ka draft sports policy bad ka youth policy kaba la pynmih paidbah (public domain), ka la jan dep ia katei ka jingpynbiang ia ka Draft Sports Policy bad hashen ka tnad Sports kan sa rah ia kitei ki jingai jingmut sha ka Sorkar Jylla ba kin shim ia ka rai kaba khatduh ban pynjari ia kitei ki policy treikam.
U Bah Banteidor Lyngdoh, President & Minister Sports, u la ai khublei ia u Bah John F Kharshiing, Working President, MSOA bad ia u Shri. Chiranjib Choudhury, General Secretary, bad ia baroh ki nongkitkam MSOA, ia ka jingshim khia ban pyntyllun ia ki kam Sports hapoh ka jylla bad u la ong ba donkam ka jingiatrei lang ryngkat jong baroh ki Association.
U Bah Banteidor Lyngdoh, Myntri Sports, u la pyntip ba ka tnad jong u ka dang bishar bniah ia ka thong Meghalaya Games, bad u la kyntu ia ka Executive Council, MSOA, ban phah ia ka kaiphod halor kane na ka bynta ban thaw lad ban pynlong ia katei ka Meghalaya Games ha u snem 2019. U la pyntip ruh ba ka Sorkar Jylla ka la bishar bniah halor ka song jingai khusnam (incentive) ki State Sports Awards ia kito ki ba wanrah takma jop (Medal winners) ha ka Zonal, National bad International.
Halor kane ka phang ka iing da kawei ka sur ka la ai jingmut ba ka Department of Sports ka dei ban pyniapher ka song ai jingiarap ha ka State Sports Awards ha ka Zonal, National and International da kaba pyniapher hapdeng ki jingialehkai ki takma (medal) Olympic bad Non Olympic, namar ki la pynpaw ba kam don nongrim ban pyniahap kyrdan ia ki takma Olympic Zonal, National International medal bad ki takma ha ki jingialehkai ki bym pat ithuh da ka Olympic (Non-Olympic).
Ha ka jingkren u Bah John F Kharshiing, Working President, MSOA, u la ai khublei kyrpang ia u Bah Banteidor Lyngdoh, President, bad Minister Sports, ia ka jingshim khia jong u ban iarap ban mang kyrpang ia ka grant-in-aid sha ki State Sports Associations, namar kumba long mynta ki don hapdeng ka jingeh kaba khraw, bad u la ong ba baroh ki State Sports Associations ki da thrang hir hir ban pynlong ia ki State Championship ban sei ia ki Champion.
U la ong ba ka MSPA ka la shim ruh ia ka rai ban thaw ki lad ban wad ruh da kiwei ki lynti bad ka jingiakren ka dang iaid shakhmat bad ki riewshimet (ki professional experts) kiba kloi ban iarap ia ka MSOA ha ka thong kumno ban kyrshan ia ki State Sports Associations ban pynkhih ia ka Sports hapoh ka jylla kum shibynta ban pynkhreh ia ka National Games 2022.
U la pyntip ba ka tnad Department of Sports, ka Team Preparation Committee, ha ryngkat bad ka MSOA, bala khlieh da i Director Sports, ki la ia kynduh bunsien bad ki State Sports Association ha kine ki bnai ban ioh ia syllok halor ka lynti shakhmat (road map) bad u ngeit skhem ba kane ka jingiakynduh kan sa iarap ia baroh ban poi sha ka thong.
U Working President, u la ong ba haduh kine ki sngi ka MSOA kam pat ioh ia ka jingtip na ka IOA halor ka jingpynlong ia ka 36th edition jong ka National Games kaba la dei ban pynlong ha Goa ha u bnai Nov 2018, bad u la ong ba ka IOA kan sa shim ia ka rai kaba khatduh halor kane ka phang. U Bah John F Kharshiing, Working President, u la pyntip ha ka AGM ba ka Executive Council, MSOA, hashen kan sa pynbeit ia ki workshops/ seminars kiba sa long kiba myntoi ia ka samla ialeh kai Sports bad khamtam ia ki State Sports Associations.
La pynwai ia ka jingialang da ki kyntien ai khublei na u Bah B Diengdoh, Vice President, MSOA, uba la ai khublei kyrpang ia u President, MSOA & Hon’ble Minister Sports & Youth Affairs uba la pynpaw ia ki jingthrang kumno ban kyntiew ia ki kam kilan met hapoh kane ka jylla, u la ai khublei ia baroh ki nongmihkhmat kiba la wan na ki Sports Association bapher bapher jong ka jylla.
