Shillong, Risaw 07: ka jingbeh seng jong ka Party Democratic Front (PDF) ia ki lai ngut ki MDC, ka seng u Bah Latiplang Kharkongor, Bah Blanding Warjri bad ia u Bah James Sylliang kala kut mynta ka sngi katkum ka shithi beh seng kaba la ai na ka party.
Ia ka shithi bala beh seng shibnai ia utei ki lai ngut ki MDC, la ai da u General Secretary ka seng u Bah Auspicious L Mawphlang ha ka 7th Nailar 2018 bad ha katei ka shithi kala kren shai ba kane ka jingbeh seng kan kut mynta ka sngi 7th Risaw 2018.
Ka jingbeh seng shibnai jong ka party PDF ia kine ki lai ngut ki MDC ka dei namar ba ki leit ban ai ka jingkyrshan ia ka Executive Committee jong u bah HS Shylla hapoh jong ka KHADC kaba la tip kum ka Khasi Hills Democratic Alliance(KHADA).
Khlem da ap pat ba kan kut por ha kaba ia dei bad ka jingbeh seng ia ki lai ngut ki MDC ka seng, ki san ngut ki MDC ka party, u bah Banteidor Lyngdoh, Hedrian Lyngdoh, Morningstar Mawsor, Arbinus Lyngdoh bad u Bah James Ban Basiawmoit kila phah ia ka shithi ba kin ai ka jingkyrshan ia ka KHADA ha KHADC.
Ha kane ka iing dorbar kaba 29 ngut, ka EC kaba la ialam da u bah Shylla mynta kala kynjoh sha ka 27 ngut, kiba don sha bar jong ka EC mynta dei sa tang u Bah PN Syiem Chairman jogn ka PDF bad ka kong Grace Kharpuri.
