Shillong, Nohprah 05: Ka seng kur ka Mei-Sin lyngba u General Secretary u bah Edward Kurbah kala phah ia ka dorkhas sha u myntri rangbah ka jylla ha kaba ia dei bad ka jingai jingmut ban wan rah ia ka jingkylla ha ka ain bad rule jong ka Meghalaya Compulsory Registration of Marriage (Amendment) Act, 2017 bad ka Meghalaya Compulsory Registration of Marriage Rules, 2015:
Na ka liang jong ka kur ka pynpaw ia ka jingkmen ban iohi ba ka sorkar Meghalaya kala pynrung ia ka kyndon 3B hapoh jong ka haba wanrah ia ka jingkylla hapoh jong ka MCRM Act bad ha ka CRMR Act ba kito kiba ia imlang sahlang kin long shi tnga wat la da kim shym la pyndep ia ka jingiathoh shong kurim.
Hapoh jong ka MCRM Act jong u snem 2012, ka don ka kyndon hapoh jong ka 2(b) kaba ong ba ka kyntin shong kurim ka kyntheup ia baroh kiba ong ba iano kano ka jingiathoh shong kurim la ki long na kano kano ka jaid ne ka niam kiba la pyndep katkum ka riti ka dustur ka jong ki la kila shong kurim biang ka dei ka jingiashong kurim, hynrei ka kyntien ba ki ia sahlang pat kam don ha ka ain.
Ka long kaba sngewlyngoh ba balei ka jylla Meghalaya ka weng noh ia kane ka ktien “Iasahlang” na ka ain ha kaba wanrah ia ka jingpynkylla ha u snem 2015, kat baka iing bishar ba ha khlieh duh jong ka Ri India ha ka 13 tarik u bnai Iaiong 2015 kala ai ia ka rai ba ka “Ka jingiasahlang” kam long beain namar ka long kum shi kurim bad ka dorbar bah jong ka Ri India kala buh ia ka kyntien “Sahlang” ba ka long ki shikurim.
Kum ka kur jong ka Mei-Sin, ka sngew ba ia katei ka ktien dei ban pynrung noh da kaba ong ba “ Ki ia lang sahlang” bad dei ban niew kum ki shikurim. Lada kata ka jingiasah lang ka long na ka bynta ba ki don ka jingiadei doh hapdeng jong ki ar ngut dei ban niew ba ki ia dei shikurim. Ia kum kine ki briew ruh dei ban da register.