Shillong, Naiwieng 27: Ka Party United Democratic Party (UDP) jong ka Umroi ka kyntu ia u Bah First Force Deki Ramsiej ba un wan biang sha ka party ban ia trei lang na ka bynta ka jingjop jong ka party ha ka MLA Election 2018 ban ia treilang bad u Bah Mangara Pathaw u ba ka party kala ai tiket.
U Bah Bantei Rynghang General Secretary jong ka UDP na Umroi u la ong ba ha ka jingshisha ka Party UDP kala dep ban pynbna ia ka kyrteng jong u Bah FFD Ramsiej ban long u kyrtong, hynrei ha dien ka jingiakren la pdiang ban plie biang ia ka jingkhang na ka bynta ban ia treilang lada ioh Tiket ma u lane u Bah Mangara Pathaw.
Ha dien ba la pdiang ia kane kala don ka jingialang jong ka EC jong ka UDP bad ha kane kila phah ia ka kyrteng jongu Bah FFD Ramsiej bad jong u Bah Managara Pathaw sha ka seng kmie ba kan rai ia u kyrtong. Ha dien ba la rai ka mih kane ka jingbym hun na ka liang jong u Bah Ramsiej.
Na ka liang jong u Working President u Bah Martin Lyngdoh u la ong ba ha jingialang kaba la long ha ka 21 tarik mynta u bnai kila rai lada napdeng kine ki ar ngut lada u wei u ioh ia ka tiket MLA u wei un ialeh ia ka MDC, ia kane ka rai kila ia mynjur lang hynrei haba la rai ban ai pat ia u Bah Pathaw ka mih ka jingong ba ki UDP na Umroi kim hun.
U President jong ka UDP Umroi u ba la don lang ha kane ka sngi u la ong ba kum ka party ka iatylli kawei bad kid a kwah ba u bah Ramsiej un wan sha ka party na ka bynta ban ia treilang na ka bynta ka jingjop jong ka seng UDP. Kaei kaba la rai ka dei ka jingiakren lang ha kaba kine ki kyrtong baroh ar ngut ki ia don lang.
