Shillong, Iaiong 29: Ka kong Macdalyne Lyngdoh Nonglait ka khun miaw jong ka Phan Nonglait haba kren ha ka sngi ba pynlait paidbah ia ka kot “ Ka Phan Nonglait, A Lady Freedom Fighter of India” kaba la thoh da u bah Daniel Stone Lyngdoh Nonglait kaba la pynlait paidbah mynta ka sngi ha KHADC, ka la kwah ba ka sorkar kan pynbna shuti ha ka burom jogn ka la ka dei ka shuti ha ka jylla lane ha ka District.
Ka kong Macdalyne ha kane ka sngi kala pynpaw kum ka iing ban ai khublei kyrpang ia u bah Daniel Stone Lyngdoh Nonglait u bala trei shitom bun bun snem ban wat bniah sha phang ka kmie tymnen jong ki haduh ba la lah ban pynlait paidbah ia kane ka kot mynta ka sngi bad kane ka dei ka burom ia ka jaidbynriew khasi ba la sei ia kane ka nongialeh laitluid.
Ha ka juh ka por kala pynpaw ia ka burom ruh ia ka seng KSU kaba la trei shitom naduh u snem 2011 haduh ban da lah ban pynlong ba ka sorkar kan pynsah nam ia kane ka nongialeh laitluid da kaba jerkyrteng ia ka Lady Hydari Park sah ka Phan Nonglait Park mynta kum ka iing ka pynpaw ia ka jingsngewnguh.
La ong ba na ka liang jong ka kum ka iing ka sem kam don kano kano ka jingujor lada ki kynhun ki leh burom ia ka la ka dei ha ka sngi kha ne ka sngi iap, hynrei kaba don kam ka long ban da ia pyntip ban don ka jingiatreilang bad ka iing ka sem, la ong ba ka iing jong ka Phan Nonglait ka dang sah haduh mynta ka Nongrimai.
