Shillong, Iaiong 18: U nongai khubor jong ka seng HNLC kaba la shah niew beain ha ka sokar ha ka kyrwoh kaba la phah mynta ka sngi kala kren sha kren shaphang ka jinglaitluid ki lad pathai khubor ha Meghalaya, ka jingkylli ka long Haei kata ka jinglaitluid jong ki? Haka 27 tarik u Jymmang 2015, Ka Meghalaya High Court (MHC) ka lah pynmih iaka hukum ba ki lad pathai khubor kim bit ban pynmih iaki khubor halor ki pakhang shnong, pakhang surok jong ki sengbhalang bad ki seng kiengatiar, bad kane ka hukum ka mih hadien ba ka HNLC ka khot pakhang shnong ha kaba iadei bad ka Village Administration Bill(VAB).
Kham ha shuwa ia kane jingjia kata haka 8 tarik u kyllalyngkot 2015 ka MHC ka lah ju pynmih teng iaka hukum ba ki lad pathai khubor kim bit ban shim interview ne pynmih ia kino kino ki jingkren ne jingthoh jong u CEM barim ka KHADC u Bah Adelbert Nongrum tang na bynta ba u kren halor ki hok ka jaid bynriew u Hynniewtrep.
Ym tang katta, u nongbishar ka HC u da byrngem syndon ia u bah Adelbert ban phah wat shaduh ‘Kala pani’ thik la kumba une u rangbah u dei u nongpyntriem kum ha ki por ki dohlieh.
Ka jingtuklar be ain ka MHC ha kitei ki snem iaka Meghalaya ka long thik kumba ka pyniaid iaka ‘parallel government’ bad dei na kata ka daw ba ki lad pathai khubor mynta ki shu kylla kai ki sohpdung bad ki langknia jong no re jongno.
Haba ka MHC ka pyrshang ban teh iaki kti bad set iaka shyntur ki lad pathai khubor te shaei kata ka jinglaitluid jong ki khamtam maki ki long ki nongpeit pyrman kiba khlainbor naka bynta ka jingmyntoi ki paidbah bad ka jylla hi baroh kawei. Lada ka MHC kam lah ban weng ia kane ka hukum bad ban ailad kylluid iaki nongthoh kotkhubor ba kin trei iala ka jong ka kam, khlem artatien kum kine ki jingjia kin nangiai jia shuh , mynta te tang da u petrol bomb tip ioh hadien sa da Chemical bomb, ong u Bah Sainkupar Nongtraw publicity Secretary ka seng beain HNLC.
