Shillong, Jymmang 02: Ka seng Hynñiewtrep National Youth Movement (HNYM) mynta ka sngi ka la leit ban iakynduh ia ka District Session Judge, East Khasi Hills District, Shillong. haba iadei bad ka jinglait post kumba 18 tylli ha ka tnat District bad Session Judges, Shillong.
Haba iakren bad ki lad pathai khubor u bah Donlang Nongbri u la pynpaw ba ha ka jingiakynduh bad ia ka kong Kharbiteng ka long ban iakren kyrpang ia kitei ki kam ba lait namarba ka bhah thungkam bad ka Roster System ka ktah, ia ka ioh kam ioh jam jong ki khun samla ka ri Khasi-Jaintia.
U working president jong ka HNYM, u la pynpaw ba ka Roster System kam dei ban treikam ha ki District Level namar ka Reservation Policy ka khlem don satia ia ki jingthoh ne ki paragraph ban ong ba la mang kyrpang, hynrei kiba lah ban thep ia katei ka kam hi kin dei beit kiba sah tang ha katei ka District.
U bah Nongbri u la iathuh ruh ba kaba jia mynta pat ka paw shai ba wat ki kam ba lait ha ki District Level, kata ha District bad Session Judges, Shillong ruh la iohi ba ka jingbate ia ki kam ba lait ka dei katkum ka Roster System kaba la mih naduh u bnai lber mynta u snem.
“Kane ka la ktah jur ia ki khun samla namar ia ka kam ba lah ban thep tang da kito kiba shong ba sah ha katei ka district, la ailad pat ia kiwei pat ki distrik, namar ka jingdon jong ka Roster System” la ong u bah Donlang Nongbri
Na ka Liang jong ka seng HNYM hi ka pynrem jur halor ka jingpyntreikam jong ka sorkar ia ka Roster System namar ia ka Roster dei ban pyntreikam tang ha ki Head Office, ha kaba ki kam ba dei ha ki District Level, ki ban thep bad ioh ia kitei ki kam kin dei beit tang kito ki ba sah ha katei ka District.
