Shillong, Naitung 26: Mynta ka sngi ka seng West Khasi Hill District Village Employment Council Association (WKHVECA) kala leit ban ia kynduh ia u myntri ba dei peit ia ki kam pynroi nongkyndong u Bah Sniawbhalang Dhar ban ia kren halor ka jingeh kaba la mih na ka jingpynhiar dor ka sorkar ia ki jingtrei ha ki shnong na ka skhim MGNREGS.
U Bah JTS Thongni Chairman jong kane ka WKHVECA, ha dien ka jingiakynduh ia u myntri sorkar, u la iathuh ba ka long ba kum ka seng kim lah shuh ban shu sngap ia ka jingpynhiar dor jong ka tnad pynroi nongkyndong ia ki dor jong ki tiar ha kaba ia dei bad ka jingpyntrei kam ia ki skhim MGNREGS.
La iathuh ba katkum ka jingpynbna jong ka sorkar ba ia ki skhim jong ka MGNREGS dei ban pynkhreh katkum ka dor jong u snem 2012-2013 katba mynta kala poi sha ka 2019-2020, kane ka long kaba ym lah ban pdiang namar ki dor jong ki mar ki matta kila nangkiew ha iew ha hat. Lada ka sorkar ka pynbor ban trei da ka dor jong u tei u snem 2012-2013 yn nym lah shuh ban trei bha. La ong ba ha kiwei ki jingtrei kam jong ka sorkar kala pyntrei kam ia ka dor jong u snem 2015-2016 balie ha ka MGNREGS pat da u snem 2012-2013.
Ha ka juh ka por la ia kren ruh ia ka jingpynslem ban siew ia ka baitiar da ka tnad pynroi nongkyndong, ha kaba la palat mynta shisnem tam ka sorkar kam pat siew kane kala buh ia ki nongai tiar ba kim lah shuh ban ai ka jingkyrshan ha kaba pyntrei ia ki skhim MGNREGS. U la ong ba kane ka juh ka jingeh kiwei ki bynta jong ka jylla ruh ki ia kynduh kum juh.
Ha kane ka jingleit ia kynduh la don lang ruh u Bah Macmilan Byrsad MLA jong ka Nongstoin. Ha kane ka jingiakren na ka liang jong u myntri ka sorkar jylla u la ai ka jingkular ba un sa khot ia ki ophisar la sngi nyngkong ban ia kren ia kane ka jingeh ha kaba pyntrei kam ia ki skhim MGNREGS ha ka jylla, la ong u Bah JTS Thongni Chairman.
