Kynmaw ieit ka AJYWO, MLA, MDC, u DC ia u Kiang Nangbah, Khlawait ka Ri Jaiñtia

Jowai/Khliehriat, Nohprah, 30:   Ka AJYWPR 32O Central Body mynta ka sngi, hapoh ka jingialam jong U Bah M.H Dkhar President, Bah H.Deolangki Dkhar, Secretary General,  bad u Bah J.Reachingson Siangshai,  Vice-President jong ka AJYWO Sengkmie lem bad u Bah  H. Kd Ryngkhlem Vice-President jong ka AJYWO-East Jaintia Zone, mynta ka sngi ki la pynlong ia ka jingkynmawieit bad burom ia ka lyngkhuh sngi iap ba 155 snem jong u u Khla-wait Bakhraw Tam ka Ri Jaiñtia, u Kiang Nangbah, ia u ba la sdien phasi ha ka Sorkar British, ha Jowai,  ha ka 30 tarik, u December, 1862 halor ka jingialeh jong u ban pynioh ia ka hok bad ka jinglaitluid jong ka Ri Jaiñtia na ka jingsynshar donbor ka Sorkar Bilat ia ka, da kaba ka AJYWO ka leit buh syntiew ha u Motdur Sah Jingkynmawieit u tei u Khla-wait ka Ri, u ba don ha Khliehriat, ia u ba la tei da ka AJYWO Central Body ha u snem dangshen.

Ha katei ka jingialang jong ka jingkynmawieit ia utei u Khla-wait jong ka Ri Jaiñtia, la ia don lang ruh u u Bah Justine Dkhar, MLA jong ka 6-Khliehriat Assembly Constituency, u Bah M.S Lhuid, IAS, Deputy Commissioner, EJHD, bad u Bah Phasmon Dkhar, E.M JHADC, bad ki dkhot jong ka AJYWO.

Ha ka jingialang kaba rit bad ishongkun, ba la pyniaid da u bah M.H Dkhar, President ka AJYWO Central Body, u Bah Justine Dkhar, MLA, u la ong, “U dap da ka sngewsarong haba u la ioh biang ia kaba kum kane ka lad ban iadon bynta  bad ka AJYWO ha kaba kum kane ka sngi kaba khraw tam ha ka history jong ka Ri Jaintia”, bad ruh u la ong “Une u Khla wait ka Ri Jaiñtia, u  la aiti ia la ka jong ka jingim na ka bynta ka Jinglaitluid bad ka Hok jong ka Ri Bad ka Jaidbynriew, kumjuh ruh, ma ngi bad ka pateng jong ngi, ngi dei ban bud ia ki dienjat jong u da kaba ngim dei ban tieng ban ieng ha ka hok bad ban kren na ka bynta ka hok jong ka Jaidbynriew”.

U Deputy Commissioner, ka EJHD, u Bah M.S Lhuid, IAS, haba ai jingkren ha katei ka jingialang, u la ong, “ Nga pynpaw ia ka jingsngewnguh ia ka AJYWO kaba la lamkhmat ia katei ka sienjam man la u snem ban kynmaw ieit ia u Kiang Nangbah, u Khla-wait ka Ri Jaiñtia”, bad ruh u la la kyntu ia ki khun ka Ri Jaiñtia da kaba ba ong “Kum ki khun ka Ri Jaiñtia, ngim dei ban klet ban kynmawieit bad leh burom ia une u Riew Khraw jong ka Ri bad ka Jaidbynriew pateng-la- pateng, lada ha kano kano ka rukom ruh, namar ba ka Ri bad ka Jaidbynriew kaba don iaka history ka dei ka Ri bad ka Jaidbynriew kaba im”.

U Bah Phasmon Dkhar, MDC bad EM ka JHADC, u la ong ha katei ka jingialang “Nga sngewkmen shikatdei eh ban ia don bynta bad ka AJYWO  ha kaba kum kane ka sngi ba khraw tam ha ka historiy jong ka Ri Jaiñtia”. U la bynrap shuh shuh, da kaba ong, “Nga sngew sarong ba ngi kum ka Jaibynriew rit paid ruh, ngi don ia u Kiang Nangbah, u Khla-wait Bakhraw jong ngi  ban ngin pynbna sha ka pyrthei bad ba ngi dei ban bud ruh ia ki dienjat jong u na ka bynta ka Ri bad ka Jaidbynriew”

U Bah M H Dkhar ha ba kren lamkhmat ha katei ka jingialang  u la ong “Wat la ka 30 tarik u Nohprah 1862, ka dei ka sngi jong ka jingiam briew kthang ha ka history jong ki Ri Jaiñtia, hynrei ka dei pat ka sngi kaba khraw tam ha ka khana-pateng jong ki Khun ka Ri Jaiñtia ka ban iai kyrsiew thiah ia ka Jaidbynriew,  namar ba dei ha kane ka sngi ba ba u “Khon Dap-Chynrang jong ka Bei Pnar (Jaintia)” u  “Kiang Nangbah Bakhraw”, na ka bynta ka hok bad ka jinglaidluit jong ka Ri bad ka Jaidbynriew, u la kiew ia u diengphasi jong ka Sorkar Bristish bad ba ia kane ka sngi, ngin ym lah ban klet dalei lei ruh em”.

Kum ka dak jong ka jingkynmawieit ia utei u Riewkhraw jong ka Jaibynriew,  la pynlong ruh ia ka jingiasngap jar ba 1 minit bad la pynbud pat da ka jingiabuh syntiew lang ha utei u Motdur Sah Jingkynmawieit ia u Kiang Nangbah.

 

What Next?

Recent Articles

Leave a Reply

Submit Comment

*

Where to buy Vidalista Professional 20 Mg (Tadalafil) tablet