Shillong, Nailar 25: Na ka daw jong kane ka khlam COVID-19 kaba la wan ban lynshop ia ka jylla Meghalaya khamtam ha kane ka nongbah Shillong, ki briew kila hap ban ia trei katba ioh ban
pyndap pynbiang ia ka bam ka sa ha iing ha sem.
Ha kane ka jingbym biang ka kam ka jam ki briew kila leit ban shong dukan madan ha Thembijoy sdang naduh ka hospital Bawri Nethralaya ter ter sha jan ban mih sha GS Road Raino da kaba tap da ki plastik ban lait na u slap bad ka sngi.
Mynta ka sngi kila don ki briew kiba la kam ia lade ba ki dei na Shillong Cantonment Board kila pynpra ia ki katto katne tylli ki trep die jhur jong ki briew kiba la tap da ki plastik kine ki dukan kiba la shah pynpra ki long hapoh ka shiphew tylli.
Kane ka Them Bijoy la ong ba ka hap hapoh jong ka Shillong Cantonment Board, hynrei kaba pynlyngoh ka long ba ki dukan die madan ha kane ka jaka ki bun bha hynrei ki briew kiba la wan ban pynpra ki long tang ia ki dukan ba don sha neng duh shuwa ban poi sha Raino.
Haba la phone sha ophis jong ka Shillong Cantonment Board ban kylli halor kane ka jingjia la ong ba ki nongtrei kim don shuh ha ophis bad ban jubab ia mynta yn nym lah namar kiba dei peit kim don.
