Shillong, Nailur 19: Ka seng Federation of Person with Disabilities(FPWDs), ka seng jong ki briew kiba don ka jingduna kaba kynthup ia ka, Meghalaya Deaf Association, Khasi Disabilities Association, All Meghalaya Association of Person with Disabilities, Meghalaya Liberation of Visually Impaired bad ka Garo Hills Association of the Deaf kan pynlong jingiakhih shong kyllaiñ mangor ba ar sngi ha nongbah Shillong.
Ia kane ka jingiakhih shnong kyllain mungor kin pynlong shi sngi ha phyllaw jong ka State Central Library Shillong kata ka sngi sdang ka 24 tarik bad ha ka 25 tarik kin pynlong ia kane ka jingshong kyllain mungor ha jaka ieng kali Additional Secretariat kaba don marpyrshah bad ka ophis BSNL.
Ha ka kyrwoh kaba la phah da ki nongialam jong ka FPWDs kila ong ba kin sdang ia kane ka jingiakhih shnong kyllain mungor haduh ka por 11 baje mynstep haduh ka por 4 baje jan miet. La ong ba kum ka Federation kala shim ia kane ka sien jam namar ba u myntri rangbah ka jylla um treh ban khot ia kren bad ki.
Kum ka Federation kala dep ban pan ba ki kwah ban ia kynduh ia u myntri rangbah ka jylla ban ia kren halor ka jingeh ka jong ki kala long naduh u bnai jylliew mynta u snem. Kumta la kyntu ia baroh ba kin ia poi sha kane ka jingiakhih ban pynsngew sha ka sorkar ia ki jingeh kaba ki ia kynduh.
Ka jingkwah jong ka Federation ka long ban ioh ban ia kren bad u myntri rangbah ka jylla ban kyntu ia ka sorkar ba ka dei ban pyntrei kam pura ia ka hok jong ki kaba ki dei ban ioh bad kham tam eh ha ka ioh kam ioh jam kaba la mang 4% ia ka bhah na ka bynta jong ki katkum ka aiñ “The Rights of Persons with Disabilities Act, 2016”.
Kane ka long katkum ka kyrwoh kaba la phah da u Bah Ferdinand M Marshillong kum u lamphang jong ka Federation bad ka samla Ibadalin Kharbuli General Secretary.
