Khliehriat, Kyllalyngkot 15: Ka AJYWO Central Body ka pynrem jur ia ka sorkar jylla halor ka jingpynkynriah ia ka Wapung C & RD Block na Wapung sha Lumshnong tang hadien khyndiat bnai ba la dep plie bad sdang tei ia ka ha Wapungskur ha ka jaka ban ai da ka C & RD Blok thymmai ha ki thaiñ Lumshnong ne Umkiang la da ka sorkar ka thrang shisha ban ai ia ka roi ka par ia u paidbah.
“Ka AJYWO ka kmen ba ai C & RD Block ka sorkar ia ka thaiñ Lumshnong hynrei ka pyrshah jur pat de halor ka rukom wanrah jong ka sorkar ia ka roi ka par ha thaiñ da ka jingpynkynriah jyndat ia ka Wapung C & RD Block, sha kitei ki thain tang hadien 8 bnai ba la dep plie ia ka. Baroh ki jingdonkam na ka bynta ban shna ia katei ka C&RD Block ha Wapung la dep pynbit pynbiang da ki 2 Dorbar Shnong-Wapungskur bad Wapungshnong naduh u bnai Iaiong mynshem snem kat kum ka jingkwah jong ka sorkar.
Kum juh ruh la plie paidbah don burom ia u Maw Nongrim jong katei ka block ha ka 22 tarik u Iaiong, 2017. La ai ruh ia ka Work Order ban pyntrei ia katei ka ophis bad ka jingtrei ka la iaid sha khmat mynta. Hynrei kaba phylla mynta ka long ba, ha kano ka nongrim ka sorkar ka ieng pat da ka jingpyndam noh ia kitei baroh bad sdang biang mynta sa sha Lumshnong. Kane ka jinglehkai jong ka sorkar ia ki paidbah jong ka thaiñ Wapung ka buh ia u paidbah jong ka thaiñ ha ka jinglyngngoh ia ki rukom trei kam jong ka” ong u Bah M.H Dkhar President ka AJYWO Central Body.
“Halor ka jingpynkynriah jyndat ia katei ka block, ka sorkar ka dei ban ai jingpynshai sha u paidbah, khamtam sha kitei ki ar DS ba pli ki ba la trei shitom 4 snem halor katei ka kam. Hato, katei ka jaka ba la ai kam biang? Lada kam biang balei pat la shim ia ka khlem da peit bniah? Ne ka sorkar ka khlem leit peit shwa ban shimti ia ka? Ne lada lah leit peit ia ka, ki ophisar ba leit peit ki shu ai report thok sha ka sorkar ba ka biang ka jaka bad mynta pat de ba la dep pyntrei ia ka kam sa lap pat ba kam biang? Ne, ka jingwanrah bad plie ia katei ka block ha Wapung ka dei tang ka jingleh stad jong ka District Administration bad ka Office BDO? Ne ka dei tang ka kam politik ia ki paidbah jong ki 100 tam ki shnong ba hap hapoh ka tei ka block?” ong U J.R Siangshai Vice President ka AJYWO.
U M.H Dkhar u la ong biang, “Ka AJYWO kam shym poi pyrkhat ba ka sorkar ba mynta hapoh ka jingialam jong u Dr. Mukul Sangma, Chief Minister, kan don ia kaba kum kane ka polisi trei kam. Hato lada lada kane ka dei ka buit trei kam jong ka sorkar ba mynta ban shu pynbunkam ia kitei ki 2 DS bad u paidbah jong ka thaiñ na ka bynta ka jingmyntoi jongno re da kaba tyrwa bad ai tang shiteng por ia kita ki skim pynroi jong ka bad ruh nud wat ban wan plie wat ia u Maw Nongrim ha khmat ki paidbah bad ki nongthoh khubor bad ruh ai wat ia ka work order bad phah sdang trei noh wut ia ka kam bad sa pyndam pat hadien ba u la sdang pyntrei ia ka kam bad sa rah noh biang shawei tang hadien, 7-8 bnai bad shata ruh sa leh biang kumba leh ia ki 2 DS bad kumta ter ter. Hato ki paidbah ki lah ban shaniah ia ka ba kum kata ka sorkar? Hato mynta ki parlok thaiñ Lumshong kin shaniah hi ia katei ka block? Ioh ia katei ka juh, ka sorkar kan sa rah biang nangtei shawei pat hadien 7-8 bnai?”
“Hato kane ka polisi trei kam jong ka sorkar kam dei ka jinglehkai ia u paidbah? Hato kane kam ktah ia ka pisa jong u paidbah? Katno lak kan bam kawei kawei ka prokram plie Maw Nongrim? Katno lak yn pynsepei ban pyntrei shiteng bad pyndam biang noh shiteng bad rah biang noh shawei bad sdang biang noh shawei bad pyndam biang noh bad kumta ter ter?” Hato ka sorkar ba mynta kan bud ia ki polisi trei kam jong u Mohammad Bin Tuglak? buh jingkylli biang u Bah M H Dkhar.
“Ko sorkar! Wat ialeh kai shuh bad ki ki paidbah ka thaiñ Lumshong kum ba phi la leh ia ki paidbah ka thaiñ Wapung. Hoid ngi iohi ba ki paidbah ka thain umkiang bad Lumshnong, ki donkam shisha ia ka C & RD Block la jong. Ai ia ki bapli da ka C & RD Block ba thymmai pynneh biang ia ka Wapung C&RD Block, ia kaba ka la ai ia ka shisien ka sngi ia ka thain Wapung, khnang ba phin ioh jingshaniah na baroh arliang.” pynkut u kyrwoh sa na u Bah H.D Dkhar Secretary General ka AJYWO.
