Shillong, Nailar 11: Ka seng Hynniewtrep Youth Council (HYC) mynta ka sngi kala pynlong ia ka jingialang paidbah ha Nongstoin bad ha kane ka jngialang kila dawa ba ka sorkar ka dei ban pyndamnoh ia ka soskular kaba la iasoi bad ka jylla Assam ha kaba ia dei bad ka jingpynbeit pud pynbeit sam bad ka jylla Meghalaya.
Haba kren ha ka jingialang u bah Robertjue Kharjahrin president ka seng kmie u la ong ka seng ka pynlang ia kane ka jingialang paidbah halor ki ar tylli ki nongrim, kaba nyngkong ka long ba ka sorkar Meghalaya ka dei ban wat ki lat ki lynti ban pyndam noh ia ka soskular namar ka dei kaba noh shilliang bad la ktah ia ka hima Nonglang, hima Nongspung, hima Jirang bad hima Mylliem ka kynnoh u nongialam ka HYC.
Kaba ar ka long ba ka sokar ha ka jingiakren pud ha ka jylla kaba ar kam dei shuh ban dang bakala namar ha kane ka jingiakren ha ka jylla kaba ar kan ktah ia ka hima Nongmysaw, hima Nongkhlaw, hima Khyriem, ha kane ka jingialang ka ong ba kane ka sorkar kan sdang noh ha dien ka jingrakhe ia ka sngi laitluid jong ka Ri India ha kaba ka seng HYC ka buh ia ka jingmaham ba kam dei shuh ban don kata ka jingbakla.
U Secretary ka hima Nonglang Sirdarship bah Birbor Riangtem la pynsngew ba ki don khatwei tylli ki shnong kiba hapoh ka hima Nonglang ia kaba u la kynnoh ba u myntri rangbah ka jylla u la pynhap noh sha Assam, la kren bynniaw ia kane ka jingleh kane ka sorkar MDA kaba mynta.
Ha kane ka jingialang da ki bun spah ngut ki paidbah kila ia wan ban sngap ia ka jingpynshai jong ka seng HYC ha kaba ia dei bad u pud u sam, ha kane kiba la kren nalor kitei ki ar ngut ki long u bah bah J.Sohshang secretary ka hima Nongmynsaw, u bah Wanteibok Lyngdoh General Secretary ka HYC jong ka West Khasi Hills, u bah Roykupar Synrem General Secretary ka HYC seng kmie bad ki wei ki wei, ia ka jingialang la pyniaid da u bah Lumlang Kharsyiemlieh President HYC ka west Khasi Hills Distict.
