Shillong, Naiwieng 12: Ka KHNAM State Youth wing hapoh ka jingialam jong u president bah Thomas Passah ka la leit ban jurip ia ka iew bad ka la leit ruh ban kynduh ia u OC pulit iew ban dawa ba dei ban shim noh da ki lynti ki ba tyngeh pyrshah ia ki dukan jong ki ba bun ki bar jylla ki ba la buh ia ki mar ki mata kiba ki die shabar ka dukan ka jingki.
Kane ka jingbuh ia mar ki matta sha bar jong ka dukan kala pynlong ba haduh lynti iaid jong u paidbah bad ruh pyrshah ia ki bar jylla ki ba khaii khlem ka Labour lane ka trading licence. Ka seng ka pynrem halor ka jingleh matlah jong ki bor ba dei peit naduh ka Hima Mylliem haduh ka KHADC.
Ka jingshah kloh pla ha iew ka la jur bha bad ka jinglong jingman jong ka iewduh kaba ngi juh tip kum ka iew kyntang ka la long kaba ijah burom. Katba ngi dang ia pyrshah ia ka jingrung kyrthep ki mynder hynrei ka long pynban kaba ishyrkhei ban iohi ba u la ioh rung pynban haduh ha iing shetja ha iewduh.
Kala dei ka por bad pynduh noh ka jingai trading license nangne shakhmat ia ki bymdei ki trai jylla. Ka KHNAM ka la buh ia ka thong ban shim ia ki sienjam ki ba tyngeh ban pynthikna ba ka khaii ka pateng kan wan phai biang sha ngi ki trai jylla, ban pyrkhin noh ia ka jingai trading licence bad ban wanrah ia ki ain pynshitom ki ba tyngeh Khang ban khanglad ia ka jingleh benami.
Lada U CEM bad ka EC jong ka KHADC kim lah ban leh eiei halor Kane ka phang kan long leh nohei ka jingbat ia ka bor. Ka KHNAM SYW ka la bthah ia boroh ki dukan ba la kyntur pud ban ym pynwit ia ki jaka iaid paidbah, bad lada ki bor ba dei peit ki dang iai leh matlah ngin sa purkhat pat da kiwei ki sienjam nangne sha khmat.
Na ka liang jong u OC pulit iew u la kular ban peit bniah halor kane ka phang. Ka seng kan sa phah ruh da ka jingthoh sha ka Hima Mylliem bad sha ka KHADC halor kane ka phang.
