Shillong, Naitung 21: Ka Peo
ple’s Democratic Front (PDF) hynne ka janmiet ka la pynpaw ba kan khot ia kren mar khmat ia ki lai ngut ki MDC jong ka kiba ai jingkyrshan ia ka Khasi Hills Democratic Alliance (KHDA) kaba la lam khmat da u Bah HS Shylla ha Khasi Hills Autonomous District Council (KHADC).
Kine ki lai ngut ki MDC ki long u Bah James Sylliang, Bah Blandingstar Warjri bad u Bah Latiplang Kharkongor. Kum ban shu pyn-kynmaw ba kine ki 3 ngut ki MDC na ka PDF, 5 na ka UDP, 4 ngut ki MDC ka NPP, 3 na ka HSPDP, u wei na ka KHNAM bad u wei u MDC shimet ki la thaw ia ka KHDA ban pynkhyllem noh ia ka Executive Committee ha ka lama ka PDA ha ka jingialam u Bah Pynshngain N Syiem kum u CEM.
Kum ban shu pyn-kynmaw ba na ka liang u Bah Pynshngain N Syiem u la resain na ka kam kum u CEM bad ha ka ilekshon jied CEM, u Bah HS Shylla u la jop da kaba suk hadien ba ki MDC ba kyrshan ia ka PDA (PDF bad Congress) ki khlem wan mih sha ka Ing Dorbar ban pynlong ia ka ilekshon jied CEM.
Kumjuh ruh hynne ka sngi ki MDC ka PDA ki khlem wan mih ban ia shim bynta ha ka ilekshon jied Dy Chairman hadien ba u Bah Morning Mawsor, u la weng noh ialade na ka ba iakhun naka bynta kane ka kam. Kumta u Bah Equator Nongrang, MDC ka Mairang Constituency u la jop suk ia ka kam kum u Dy Chairman.
Halor kine kiei ka PDF ka la kynnoh ba dei na ka daw kine ki lai ngut ki MDC ba ka party kam shym la ioh shuh ia ka lad ban lam khmat ia ka Executive Committee ha KHADC bad duh ruh ia ka shuki Dy Chairman. Na ka liang ka party ka la pynlong ia ka jingialang kyrkieh hynne ka janmiet ban ia tai halor ka long ka man jong ka sain-pyrthei ha KHADC.
Na ka liang u President ka PDF u Bah Ivanlumlang Marbaniang u la ong, “Ka PDF ka don 11 ngut ki MDC hynrei 3 ngut ki MDC – Bah James Sylliang (Mawhati Constituency)” U Bah Blanding Warjri (Mawthadraishan Constituency) bad u Bah Latiplang Kharkongor (Nongthymmai Constituency) ki la la leit ban ai ka jingkyrshan ia ka KHDA ba lam khmat da ka NPP. Kumta na ka liang ka party ka la khot pynlong da ka jingialang ba kyrkieh hynne ka janmiet “.
U la ong ,”Naka liang ka party ka la khot ia kren ia kine ki lai ngut bad ki khlem wan satia bad la aiti ha u Bah Hamlet Dohling, ban ia kren bad ki la pyni ia ki daw. Kumjuh ruh la phah ia u Bah Banteidor Lyngdoh, bad ha u MLA ka PDF na Sohra bad u Bah Jason Mawlong na Umsning hynrei kine ki MDC kim shym la ai ktien”.
Na ka liang jong ka PDF kala dep thep ia ka kyrteng u Bah Morning Mawsor ban ia khun na ka bynta ka kam Dy Chairman ka KHADC hynrei la hap weng noh na ka daw ba ki MDC lai ngut kim ai ka jingkyrshan. La phah shithi ia ki ban kyrshan ia u Bah Morning Mawsor bad haduh hynne step hynrei kim shym la ym ai ktien bad kum ha la hap ban weng noh”,la ong u Bah Ivanlumlang Marbaniang uba la iathuh ba ka Central Working Committee ka PDF ka la aiti sha ka Disciplinary Committee ba lam khmat da u MLA ka Sohra u Bah Gavin M Pariat kum u Chairman ban ia kren halor kane ka kam.
U MLA ka Sohra, u la ong, “Hadien ba ka CWC kala aiti sha ka Disciplinary Committee, nga la khot jingialang ba kyrkieh ngi la ia rai ba ngin khot ia kren ia kine ki MDC bad kila buh por ba kin wan iakren ha ka 23 tarik u Naitung shwa ka 12 baje mynsngi bad lada kim wan ngin hap ban shim da kiwei pat ki kyndon bad ngin aiti sha ka CWC ia ka kaiphod ban shim pat ia ka rai “.
U Bah Ivanlumlang Marbaniang u la iathuh ba kine ki lai ngut ki MDC la phah ia kynduh ia ki myntri bad ki la kam ba ki dang don ha ka party hynrei ki la pynpaw pat ba ki la don ka jingiateh kular bad ka KHDA ba kin ioh shuki Executive Member. ” Ki la pan por bad ki la iathuh ba ki la ai jingkular ban kyrshan ia ka KHDA. Ngi pyrshang bam teh song ia ki bad ki donkam ban sngewthuh”, la ong u President.
Na ka liang u Secretary u Bah Auspicious Lyngdoh Mawphlang u la ong ba ka party ka khlem ai jingmut ba ki MDC ka party kin leit kyrshan ia ka KHDA. “Ka long ka daw ba kongsan ba ka party ka la duh iaka shuki CEM bad Dy Chairman ha KHADC bad kumjuh ban lam khmat iaka Executive Committee”.
Halor u Bah James Sylliang, u MDC uba ka PDF ka la beh seng shipor bad khot biang, na ka liang ka PDF ka la ong ba kane ka kam ka kynthup lut ha ka jingiakren na ka bynta baroh lai ngut ki MDC bad ki kyndon kin long kumjuh ha kaba kan sa shim rai hadien ka jingwan iakren jong ki.
