Shillong, Nailur 01: Ka seng Association for Democracy and Empowerment (ADE) ka pynpaw ia ka jingsngewsih kthang ban tip ba ki samla pule kiba la shah jied ban leit doctor na ka jylla Meghalaya sha ka jylla Assam kila shah kyntait ha ki Medical College jong katei ka jylla. La ong ba la shu kyntiat mardor ia ki khlem aid aw, kine kiba la shah kyntait baroh ki dei kiba la ioh ia ka bhah jong ka jylla Meghalaya lyngba ka NEC.
Katkum ka jingtip kaba ka seng ADE kala ioh ka long ba katkum ka hukum jong ka sorkar Assam kaba la pynmih DME/UG/29/2017/8164-66 ia kaba la soi da u Director jong ka Medical Education, Assam ia kaba la phah sha baroh ki Medical Colleges kiba don ha Assam ba dei ban pynduh noh ia ki 13 tylli ki seat na ka bynta ka jingpule MBBS ia kiba la ai sha ka jylla Meghalaya lyngba ka bhah jong ka NEC bad kane kala pynduna ia ki seat na ka 15 ki seat sha ka 6 tylli ki seat.
Ka ADE, ka kynnoh ba kane ka jingleh kmienah jong ka sorkar Assam ia ki samla pule jong ka jylla Meghalaya kala ktah shisha ia ki, na ka liang jong ka seng ADE ka dawa na ka sorkar Meghalaya ba ka dei ban pynioh jaka pule ia kine ki samla bala shah jied ban pule ia ka MBBS. Ka seng kala ong ba hadien 45 snem ba la ioh ia ka jylla la jong ruh rum ka sorkar kam lah ban ai jaka pule doctor ia ki briew la jong.
Na ka liang jong ka ADE ka kyntu ia ka sorkar Assam bad sorkar Meghalaya ba kin ia pynbeit ia kane ka jingeh jong ki samla pule doctor khnang ba kine ki samla pule doctor kin ioh ban pyndep ia ka jingpule jong ki kumba kila trei shitom, la ong u Dalseng Bira Ch Momin President jong ka seng ha ka jingpynlait khubor jong u mynta ka sngi.
