Shillong, Jymmang 07: Ki nong jngohkai pyrthei na kylleng ka Ri India haba ki wan sha Shillong, ki hiar ban peitkai ia ka pung Umiam, kaei kaba kila kynthoh ka long ka jingjaboh katei ka jaka namar ka jingbym lah ban pynkhuid ka Meghalaya Tourism Development Corporation (MTDC) wat la kala khrong bai rung T.60 tyngka shikhlieh briew bad ka kali la ka jong ka dor.
Kaba la pynisait met ia ki nongleit jngohkai ka long ba ki plastik kiba la bret pathar dang ki nongleit kai ym don ba pynkhuid, ka jingbret pathar ia ki bilor kyiad kiba la shu pynieng ha lynti syngkieng kane kala ktah ia ka burom ka ijot jong ki nongwan kai namar ba ym lah ban pynkhuid ia kane ka jaka kaba khring ia ki hajar ngut ki briew man ka sngi.
Ka MTDC kam shym la lah ban pynbha ia ki jingialehkai ki khynnah kiba la bun ba dkut ha katei ka jaka, ka MTDC kala khang tala ia ka jaka iaid kjat ha Suin bad ia ki jaboh bala song ha ki plastik khlem pynkhuid man ka sngi, kane ka jingbym lah ban pynkhuid kala ktah mationg ia ka jingtrei kam jong ka MTDC kaba dei peit ha kaei ka jak jngohkai bala pyniaid da katei ka kynhun treikam jong ka sorkar.
Ka pung Umiam ka dei jaka kaba la khring ia ki nongwan jngohkai pyrthei ym tang ia ki briew kiba na shabar ka jylla hynrei wat ki trai shnong ruh leit da ki spah ngut man ka sngi sha katei ka jaka ban leit iaid kai pyngad, ka jingjaboh jong katei ka jaka ka ktah ia ka jylla bad khamtam ia katei ka MTDC kaba dei peit ia ka.
Khlem da pynpaw kyrteng haba kren ha u SP News Agency kila pynpaw ba kane ka jaka ka dei kaba itynnad haduh katta katta, hynrei ka jingbym lah ban pynkhuid bad pynbha ia ki jingialehkai da ka MTDC kaba peit ia katei ka jaka kala pynisait met ban peit ia kane ka jaka jngohkai pyrthei.
ka MTDC kala dei ban buh ia ki briew ban peit ba ki nongleit kai sha katei ka jaka kim dei ban ioh rah bilor kyiad, kim dei ban bret ia ki jingsong plastik kaba ki mon, ka dei ban pynbiang ia ki jaka bret jaboh ban wanrah ia ka jingkhuid ha katei ka jaka.
