Jowai, Nailur 16: Ka Khasi Students Union Laskein Circle mynhynne ka Sngi hapoh ka jingialam u Samla Justi
ce Paul Lyngdoh Asst Publicity Secretary ka KSU Laskeiñ Circle, ka la leit ia kynduh ia u Ma Sñiawbhalang Dhar u Myntri ka Sorkar Jylla ha Circuit House Jowai naka bynta ban buh iaka jingdawa ban kyntiew kyrdan iaka Laskein Crd Block sha ka Civil Sub Division.
Ka Seng haka jingthoh kaba la phah sha utei u Myntri Sorkar ka la ong, ba ka Laskein C&RD Block kadei ka block kaba la rim tam bad iakaba la buh maw nongrim ha u snem 1973 bad ka don haduh 96 tylli ki shnong kynthup ruh iaki shnong khappud bad ka Assam.
Ha kaba iadei bad ka jingbunpaid ka Seng ka la ong ba ka thaiñ Laskeiñ Block ka don ia palat 92 hajar tam ki paidbah nongshong shnong bad ka kynthup ruh ia ar tylli ki Constutuency kata ka Mowkaiaw LA Constituency bad ka Raliang LA Constituency.
Halor kitei ki nongrim, ka Seng ka la pynpaw ba ka Laskein CRD Block ka ladei hok ban ioh iaka jingkyntiew kyrdan khnang ban pynsuk iaka rukom ai jingshakri bad ki paidbah ka thaiñ khamtam iaki shnong kiba don ha Khappud.
Ka Seng ka kyntu ia utei u Myntri ban shimkhia ia kane ka jingdawa ka jong ka Seng na ka bynta ban kyntiew kyrdan khnang khnang iakatei ka Block sha ka Civil Sub Division naka bynta ka bit ka biang u paidbah bad ha kajuh ka por ka Seng ka kyntu ruh ia utei u Myntri ban rah iakatei ka mat sha u Myntri Rangbah ka Jylla khnang ban ioh pynurlong kloi kloi iakatei ka jingdawa ka Seng.
Naka liang u Ma Sniawbhalang Dhar ula kular ban shimkhia iakatei ka kam bad hakajuh ka por u la kular ruh ba un sa pynpoi iakatei ka jingthoh jong ka Seng sha u Myntri Rangbah ka Jylla na ka bynta ban ioh bishar bniah iaka kam.
