Jowai, Jymmang, 03: Ka AJYWO Central Body ha u kyrwoh khubor ba la pyllait da u Bah M H Dkhar, President jong ka seng, ka kyntu ia ka MeECL, Jowai Distribution ban kylliang noh kloi kloi ia u wei u rishot (post) light ha Jowai, u ba la bam sarang bad jan dkut noh u ba don ha jan ka Office Vodafone, Jowai, ha u surok ban leit sha Jowai, Pohskur.
“Ha ka jinglap jong ka AJYWO mynta ka sngi, ka la kyndit ban iohi ba la don u wei u rishot (post) light u ba heh bha u ba la bam sarang na trai bad jan dkut noh bad sah satang 20% bad une u post light, lada ka MeECL, Jowai kam kylliang noh kloi ia u, u la ban dkut bad khyllem noh ha kano re kano ka por bad kaba sngew ma shuh shuh ka long ba utei u post light u don ha nongbah Jowai ka jaka ba bun bha ki paidbah bad lada u khyllem u lah ban wan rah ia ka jingiam briew kaba jur”, ong u Bah M H Dkhar, President ka AJYWO Central Body.
Ka seng, namar kata, ka kyntu ia ka MeECL, Jowai Distribution ban kylliang noh wut ia utei u rishot light ba buh ia ka jingim briew ha ka jingma kaba khraw bad ruh ha ka juh ka por, ka seng ka kyntu ruh iaka MeCL ban leit peit bniah bha, ioh lehse ki dang don shibun ki post light ki ba long kum u tei mynta kiba don ha sor Jowai bad ruh ban kylliang ia kiba kum kita kloi lada lap ia ki, khnang ban lait na ki jingjia ba sngewsih.
