Jowai, Nohprah, 11:Ka AJYWO Central Body ka pynpaw ia ka jingsngewbitar kaba jur halor ka jingshim kabu jong u wei u Nepali, u Krishna Sapkota, ba sah ha Khlieriat ban pyndonkam bakla ia ka bor jong u Waheh Shnong ka Latyrke, East Jaintia Hills, da kaba ai syrnod Residential Certificate ia ki hajar ngut ki Nepali bad Bengalee ha ka kyrteng jong u Waheh Shnong ka Latyrke ha ka dor Rs.700/- haduh Rs. 1000/- tyngka kawei na ka bynta ban ioh kamai spah ia lade bad ruh ban pyni ba kitei ki nongwei ki shong ki sah ha Latyrke kat kum ba la paw ha ki lad pathai khubor mynta ka sngi.
“Katei ka jingleh jong utei u Nepali ban kamai spah ia lade da katei kam ka dei ym tang ka kam beaiñ (crime) hynrei ka dei ruh ka jinghiar thma ba jar jar ia ngi ki trai ri trai muluk bad kane ka buh ia ka Ri bad ka Jaidbynriew rit paid jong ngi ha ka jingma kaba khraw la shai la shi sngi”, ong u Bah M H Dkhar, President, jong ka AJYWO Central Body.
“Pleng nalor ba ka Jaidbynriew rit paid jong ngi mynta,ka la shah hiar thma ha kiba bun ki rukom kiba jar jar, mynta imat kan sa shah hiar thma jar jar sa na ka Aadhaar Card. Lada utei u Nepali u la dep sam SyrnodLatyrke sha ki 1000 ngut ki nongwei kiba dei tang ki nongwan bylla sngi shane, kane ka la buh lypa ia ka Jaidbynriew jong ngi ha ka jingma kaba khraw”, ong sa u Bah Reachingson Siangshai, Vice President ka AJYWO Central Body lyngba u kyrwoh.
“Ha ka jingiadei bad katei ka kam beaiñ jong utei u Nepali, ka seng ka kyntu jur ia ki bor jong ka aiñ ban ban tohkit, thwet, kem bad pynshitom lut ia baroh kito kiba don kti bad ruh wat ia kito kiba la ioh ia katei ka syrnod beaiñ kat kum ka aiñ namar kitei ruh ki iadon kti lang, lym kumta kin ym nud ban pdiang ia katei ka syrnod na utei u Nepalinamar ki tip bha ba ka dei ka kam beaiñ,” ong shuh shuh u Bah Reachingson Siangshai.
Ha kawei pat ka liang u Bah M H Dkhar u la ong shuh shuh“Ka seng ka kyntu jur ruh ia baroh ki Waheh Shnong jong ka Jaintia Hills ba kim bit ban ai syrnod khlem da pyndap lypa (Blank Residential Certificate) sha ki nongshongshnong, hynrei dei ban da pyndap lypa bad ruh buh rekod thikna bad shai bha naduh ka kyrteng, ka number, ka tarik bad ki daw ba la ai ia ki bad kumta ter ter ha ka Bui Buh Jingthoh (Register) jong ka shnong , khnang ba ka jingai syrnod jong ki kan buh ia ka jaibynriew ha ka jingma ha dien ha bud”.
U Bah M H Dkhar u la bynrap shuh shuh da ka ba ong ba, hoid ka sorkar ka ong ba u Aadhaar um dei ka sakhi ia ka jinglong-traishnong jong u briew hynrei u dei tang ka jingpynithuh ia u briew bad ka jaka sah jong u. Hynrei ngim lah ban shaniah ia kane, namar ngi la iohi ia ka nuksa na ka EPIC ba ka la tam (Over-ride) mynta ma ka ia ka syrnod ki Waheh Shnong ha ki jingdonkam ha ki tnad sorkar ne riewshimet (Private). Kumta ngi tieng ba ioh ka por kan sa poi ba ia ka jinglongtraishnong jong u briew yn sa pynshong nongrim na u Aadhaar bad lada kane kan jia,ka Jaidbynriew kan sa don ha ka jingma lada ngim husiar halor ka jingpynrung kyrteng ki nongwei ha u Aadhaar.
“Na ka bynta ka iap kaim jong ka Jaidbynriew, ka AJYWO ka kyntu ruh ia ki bor district ba ki dei ban long kiba peit ngor bha ha ka jingpynrung kyrteng Aadhaar Card. Ki dei ban ai hukum ia ki nongpynrung kyrteng Aadhaar ba ki dei ban pdiang tang ia ki tiar ri trai muluk bad kata tang lada ki lah ban pynbiang ia lade da ki syrnod na ki Waheh Shnong bad ia kiba la dep pynshisha (attested) da ki bor ba deil eh ia kata, Katba ia kiwei pat ki ba wan trei bylla ne leh business ha Jaintia Hills ym dei ban shah ia ki ban pynrung kyrteng Aadhaar na Jaintia Hills, hynrei ai kini mat leit leh hi sha la ki jong ki shnong jong ki lada ki kwah Aadhaar khnang ba ka jingpyntrei kam ia u Aadhaar Number kan ym ktah ia ka lawei jong ka ri bad ka Jaidbynriew” ong biang u Bah Reachingson Siangshai.
Ka AJYWO shen kan sa ia kynduh ia u Deputy Commissioner jong ka EJHD bad ruh ia u CEM jong ka JHADC ban buh ia ki mat jingdawa jong ka halor ka jingpynrung kyrteng Aadhaar.
