Kyntu ka BJP ia u Lat  ban kren bad ka sorkar pdeng ban pynkloi ka iakren ia suk bad ka HNLC

Shillong, Nohprah 17: Mynta ka sngi ka Parliamentary Board jong ka party BJP kaba kyntup ia ki ar ngut ki MLA u bah AL Hek bad u bah Sanbor Shullai kila leit ban ia kynduh ia u Lat jong ka jylla u Satya Pal Malik ban ia kren bad ha kaba ia dei bad ka jingleit jong u sha Delhi ban ia kynduh ia u myntri rangbah duh jong ka Ri India u Narendra Modi bad ia kiwei ki myntri.

U bah Hek bad u bah Sanbor  haba kren ha ki lat pathai khubor ha dien ka jingiakynduh bad u Lat na ka liang jong kine ki ar ngut ki MLA kila kyntu ia u Lat ka jylla ba yn ia kren lem bad u myntri rangbah duh ka sorkar pdeng bad u myntri kam poh iing ka jylla ban pynkloi ia ka jingiakren ia suk bad ka seng lehnoh HNLC namar baroh ki briew ha kane ka jylla ki kwah ia ka jingsuk.

U Bah Hek u la ong ba kane ka jingkwah ban ia kren ia suk bad ka HNLC ka dei ka kam kaba la slem bha bad na ka liang jong kine ki ar ngut ki MLA ka BJP kila kyntu ia u Lat ba un ia kren bad u Myntri kam poh iing ka sorkar pdeng ba kan don noh ka jingiakren ia suk bad ha ka HNLC ha ka juh ka por la kyntu ia ka HNLC ba kan sangeh noh ia ki kam pynsyier.

Kiwei pat ki mat kiba ka BJP kala buh ha khmat jong u Lat ka jylla ba un ia kren lem bad ka tnad pule puthi jong ka sorkar pdeng ba un ia kren lem sha Delhi ba lada don ki briew kiba la bit la biang na ka jylla kan bha ban thung ia u Vice Chancellor ba dei na kane ka jylla bad khamtam eh lada ioh da ka long kmie.

Ha ka jingiakynduh la ia kren ruh ha kaba ia dei bad ka jingdawa ia ka Inner Line permit ha kane ka jylla Meghalaya bad kila kyntu ia u Lat ba un ia kren lem ia kane bad u mytnri rangbah duh jong ka Ri bad u mytnri kam poh iing ka Ri India.

U bah Sanbor u la ong ba ha kane ka jingiakynduh kila kyntu ia u Lat ka jylla ba un ia kren lem bad ka Delhi ban pynrung noh ia ka ktien khasi bad Garo ha ka khyngit kaba phra jong ka Riti synshar jong ka Ri India. Ha kane ka jingiakynduh na ka liang jong u Lat ka jylla u la kyntu ruh ia ki ba kin leit sha Delhi ban ia kren lem.

Haba ia dei bad ka MRSSA Amendment , na ka liang jong u Lat ka jylla u la ong ba u dang pule khyndait bad u dang peit ia ki kyndon kiba ia dei bad ka ain. Ha kane ka jingiakynduh kila ia kren ruh ha kaba ia dei bad ki kampynroi ha kaba ia dei bad ka jylla Meghalaya.

 

 

What Next?

Recent Articles

Leave a Reply

Submit Comment

*