Shillong, Naitung 01: Ki Nongialam jong ka Hills Fame
rs Union (HFU) Central Body mynta ka sngi ki la leit ban iakynduh ia u Symbud Myntri Rangbah ka jylla (Dy.CM) u bah Prestone Tynsong ban iakren halor ki jingeh ba ki nongrep ka jylla ki iakynduh.
Nalor kiba bun ki mat jingdawa kiba ka seng ka la buh hakhmat u Dy CM lyngba u President bah Commander Shangpliang bad u Bah Allfondbirth Kharsyniew General Secretary , ka jingdawa ban mang pisa kham bun na ka bynta ka tnad ka rep ka riang ka dei kawei na ki mat.
Ka seng ka la kyntu ruh ia u Dy. Chief Minister ba kan mang pisa kyrpang na ka bynta ka mushroom mission khnang ban pyntreikam ia ka jingthmu ban rep tit ha ka jylla. Ka seng ka la dawa ruh ba dei ban siew bailut ksan halor ka jingshah pynjulor jong ki ksing ngap ha ka shnong Mawpyrthuh ha ka dyngiem.
Shuh shuh ka seng ka la kyntu ia u Dy CM ba un bthah ia baroh ki tnad sorkar kiba dei jong ka tnad ka rep ka riang bad kiwei kiwei kiba iadei bad ki nongrep ba ki dei ban jubab ia ki shithi haba ki nongrep ki thoh shithi bad kim dei ban shu sngap mynthi.
Shuh shuh ka seng ka la iakren ruh u bah Prestone Tynsong uba dei ruh u myntri ba dei khmih ia ka tnad PWD ba un iarap ban pynbha maramot ia ka surok na Liarbang lyngba ka Mawlasnai ter ter haduh Nartiang.
Shuh shuh ka seng lyngba u Bah Shangpliang bad bah Allfond ki la kyrpad ia ka sorkar ban pynkloi ia ka jingiarap sha ki nongrep kiba la shah ktah na ka jingshah pynjulor jong ki mar rep ha ka bor mariang.
Ka seng ka la iakren bad pynkynmaw ruh ia u Symbud Myntri Rangbah ban pyntreikam noh ia ki mat jingdawa kiba la buh da ka HFU ka ka por ba la pynlong ia ka 1st Farmer parliament.
La kyntu ia ka sorkar ba kan mang pisa na ka bynta ban pynlong man la u snem ia kane ka dorbar bah jong ki nongrep Farmer Parliament kaba dei ka jinglam khmat kaba nyngkong da ka HFU ha ka ri India hi baroh kawei la bynrap shuh shuh u bah Commander Shangpliang.
