Jowai, Kyllalyngkot 11: Ka JSU ka lah kyntu sha ki riew paidbah ban kiar na ka jingialam tuh ia ki khar Bangla, ban husiar bad ruh ban long kiba la pynkhreh ban iada ialade.
Ha ki jingjia ba dang shu dep jia ha ki thain khappud India Bangladesh kaba la pynshongsyier ia ki nongshongshnong jong ka thaiñ Riwar Jaintia khamtam ha ki Ar khep ha lad Daarang bad ha Amdoh ka JSU ka la kyntu ia ki nongshongshnong ban long kiba husiar.
U President ka JSU War Jaintia Circle, U Eddy Kery Pohtam la kyntu sha ki paidbah ba kidei ban long kiba la pynkhreh ha ka iaid ka iieng ka jong ki bad ki jaka sah ki jong ki bad jaka trei ki jong ki. U la kyntu ba ki dei ban pynbiang ruh ia ki tiar ialeh kum ki suloi bad kiwei pat ki tiar iada khnang ban lait ialade na kine ki nongthombor.
Kumjuh ruh u la aj jingmut ba ki BSF bad ki Police ki ladei ban shimkhia ban pyrkhing ia ki nongleit nongwan kiba khamtam ki dkhar da kaba khynra ia ki khamtam ha ki jaka kum ha Dawki bad Muktapur namar ba bun jyllei ki khar Bangladesh.
Kiba wan shane khlem da biang ki kot ki sla bad ruh kine hi bunsien ki long kiba don ia ka jingmut ban pyntriem, ban tuh bad ruh ban knieh ruh ia ka japliang ki trai shnong da kaba trei bylla bad ruh ha ka khaii ka pateng. U la iathuh ruh ba bun ruh napdeng jong ki kiba pyndonkam da ki ID sorkar ba shna tuh ba ioh na jylla Assam bad kiwei pat ki jylla.
Ka JSU ka la ai jingmut ba dei ban iatreilang ki Pulit lane ki BSF ha ka Patrol duty ha kaba ki dei ban iadon bynta lang ki traishnong namar ba ki kham tip bha maki ia mano ki bym dei nangne. Ka jingdon ruh ki trai shnong kan pynkhlain ruh ia ka jingbun ki nongpahara. Ka la dei ruh ba ki trai shnong khamtam ha ki bri ban don ia ki suloi katkum ka jingaijingbit ka sorkar kaba ki ju ai ban iada ia ki jingrep ki jong ki. Kumjuh ruh ka seng ka la pan ruh ban pynkham bun ki pulit bad ruh ki BSF.
U samla Eddy Pohtam u la ong ruh ba na ka jingleitkhmih jong ki ia kine ki jaka ba jia ka jingthombor ba lah ban ong ba ka jingwan ka jong ki nonglute ka dei lyngba ki lynti ba un um lah tip lada um dei ba ialam da ki briew ba la ju wan teng kiba iadei kam hi bad ki trai shnong. Ka jingwan ruh ka jong kine ki runar kam dei shuh ka jingmut kaba dei tang ban lute hynrei ka la long ruh ba ki mut ruh ban rahbor ia ki trai shnong bad ban dawa pisa na ki.
Ka JSU War Jaintia Circle bad ki nongshongshnong ka Bakur bad Dawki ki la kem ruh ia lai ngut ki khar bangla ki bym don ki kot ban pynithuh ryngkat ki phone ba pyndonkam da ki Sim Card Bangla bad ki pisa Bangla ha Bakur bad Dawki ha ka 9 tarik bad la buh ujor FIR pyrshah ia ki da u President, Eddy Kery Pohtam ha ka jingiadonlang u General Secrary, u Kerrydiam Lamin bad u Sports Secretary u Eric Khonglah. Ka seng ka la ong ruh ba kan dang iai kem shuh shuh bad ka pynbor ruh ia ki bor pulit ban kem ia ki bad un um pyllait ia ki.
Ka JSU War Jaintia Circle ka la iatreilang ruh bad ki pulit bad BSF ban wad pyntikna ia ka jingwan kine ki runar ba ki dei ki nong Bangladesh ha ka ba ka ki la poi ryngkat lang bad ki pulit bad ki nongshongshnong ka Nongtalang ha Amdoh ha ka ka por 2.30 step ha ka sngi ba ka jia bad ki la buddien ia ka snam jong u nongthombor ba shah siat bad la lap ba ka lam beit shaduh sha Bangladesh.
Ka seng ka la pynbor ruh ia ki BSF ba kin wad jingtip ia ka jingdon ki ba mynsawjur sha Bangladesh ha kaba ynda sngi la wan ai jingtip da ki BGB ha kaba don lang u Commander Ka BGB bad ki pulit ka Bangladesh ba ki la ioh kem noh ia u ne uba mynsaw.
La ioh jingtip ruh ba la ioh kem ruh sa 7 ngut ia kine kiba donkti. La tip ruh ba u wei na ki dkhot ka seng u Aibor Nonglamin u don lang bad u Pratap Bareh ha kaba u la iarap ban beh krad ia kine. U Aibor Nonglamin ha kato por u sah lang ha iing u Bah Pratap Bareh. U Bah Pratap u ba long ruh u nongpahara ia ka bri u sah mar syndah ia ka iing ba sah u Aibor bad ka meiieid ka jong u. La tip ruh ba ka jingwan kine ki runar ka long ba ki thmu ban lute, ban rahbor bad ia ka meiiied jong u.
Kane ka jingjia ka la pynshongsmier bad pynlong ba tad haduh ka miet jong ka 10tarik ba shaduh sha shnong Nongtalang ba bun ki briew ki la ia apmiet hapoh shnong bad sharud shnong hadien ba don ka jingioh jingtip ba don sa shi kynhun kumba 10- 15 ngut ki rung na Amlympiang.
Ka JSU war jaintia circle ka la dawa ruh na ka MeECL ban pynbiang noh kloi ia ka bording h Amdoh ha kaba ka la jandap 2nem mynta um pat bujli ia u Transformer. Ka JSU ka la dep ban buh jingujor sha ka MeECL bad u DC West Jaintia Hills naduh u bnai jong u August 2019.
